ദുബായ്:നിലവിലെ സാഹചര്യത്തിലും ദുബായിലെ അതിർത്തികളിൽ അനുഭവപ്പെടുന്ന വൻ ജനത്തിരക്കും വിവിധ രാജ്യക്കാരുടെ വലിയ തോതിലുള്ള കടന്നുവരവും, വിശ്വസനീയമായ ഒരു ആഗോള ലക്ഷ്യസ്ഥാനം എന്ന നിലയിലുള്ള ദുബായിയുടെ പദവിയെയാണ് സൂചിപ്പിക്കുന്നതെന്ന് ദുബായിലെ ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സിന്റെ മേധാവി ലഫ് : ജനറൽ മുഹമ്മദ് അൽ മർറി അഭിപ്രായപ്പെട്ടു. യാത്രാ നടപടിക്രമങ്ങൾ മികച്ച കാര്യക്ഷമതയോടെയും തടസ്സങ്ങളില്ലാതെയും കൈകാര്യം ചെയ്യുന്നതിൽ ദുബായ് ലോകത്തിന് തന്നെ മികച്ച മാതൃകയാണെന്നും അധികൃതർ ചൂണ്ടിക്കാട്ടി.
ആഗോളതലത്തിലും പ്രാദേശികതലത്തിലും നിരവധി മാറ്റങ്ങൾ സംഭവിക്കുന്നുണ്ടെങ്കിലും, സുരക്ഷിതവും സുസ്ഥിരവുമായ ഒരു അന്തരീക്ഷം ഒരുക്കുന്നതിൽ യുഎഇക്കും ദുബായ്ക്കും ഉള്ള കഴിവിലുള്ള അന്താരാഷ്ട്ര സമൂഹത്തിന്റെ വിശ്വാസമാണ് ഈ വർദ്ധിച്ചുവരുന്ന ജനത്തിരക്ക് വ്യക്തമാക്കുന്നതെന്ന് ലഫ്റ്റനന്റ് ജനറൽ മുഹമ്മദ് അഹ്മദ് അൽ മർറി പറഞ്ഞു.
ദുബായിൽ ഞങ്ങൾ കേവലം അതിർത്തി പോർട്ടുകൾ മാത്രമല്ല നിയന്ത്രിക്കുന്നത്, മറിച്ച് പ്രതീക്ഷയുടെയും സ്ഥിരതയുടെയും ഒരു കവാടം കൂടിയാണ്. ഒരേസമയം ലോകത്തിന്റെ വിവിധ ഭാഗങ്ങളിൽ നിന്നുള്ളവരെ യാതൊരു ബുദ്ധിമുട്ടുമില്ലാതെ സ്വാഗതം ചെയ്യാൻ സാധിക്കുന്നത്, സുരക്ഷയുടെ മരുപ്പച്ചയും ലോകത്തിന്റെ സംഗമസ്ഥാനവുമായ യുഎഇയിലുള്ള വിശ്വാസത്തിന്റെ ശക്തമായ സന്ദേശമാണ് നൽകുന്നതെന്ന് അദ്ദേഹം കൂട്ടിച്ചേർത്തു.
ഞങ്ങളുടെ ഉദ്യോഗസ്ഥർക്കുള്ള നിർദ്ദേശങ്ങൾ വളരെ വ്യക്തമാണ്:ജനങ്ങൾക്കാണ് എപ്പോഴും പ്രഥമ പരിഗണന. ദുബായിലെത്തുന്ന ഓരോരുത്തർക്കും തടസ്സങ്ങളില്ലാത്തതും ഡിജിറ്റലുമായ പ്രവേശന അനുഭവം നൽകാൻ ഞങ്ങൾ പ്രതിജ്ഞാബദ്ധരാണ്. ഇത് ആളുകളുടെ ജീവിതനിലവാരം മെച്ചപ്പെടുത്തുന്നതിനൊപ്പം വിശ്വാസം, കാര്യക്ഷമത, നിരന്തരമായ സജ്ജീകരണം എന്നിവയിൽ കെട്ടിപ്പടുത്ത ഒരു ആഗോള ലക്ഷ്യസ്ഥാനം എന്ന യുഎഇയുടെ പ്രതിച്ഛായ കൂടുതൽ കരുത്തുറ്റതാക്കുകയും ചെയ്യുന്നു,ലഫ്റ്റനന്റ് ജനറൽ അൽ മർറി വ്യക്തമാക്കി.
ആധുനിക ഡിജിറ്റൽ സംവിധാനങ്ങൾ നടപ്പിലാക്കിയും പ്രവർത്തനക്ഷമത വർദ്ധിപ്പിച്ചും പോർട്ടുകളിലെ സേവനങ്ങൾ ജിഡിആർഎഫ്എ നിരന്തരം മെച്ചപ്പെടുത്തുകയാണ്. യാത്രക്കാർ എത്തിച്ചേരുന്ന ആദ്യ നിമിഷം മുതൽ ഏറ്റവും മികച്ചതും സുഗമവുമായ സേവനം ഉറപ്പാക്കാൻ ഇതിലൂടെ സാധിക്കുന്നു. നൂതനാശയങ്ങൾ, ഭാവിയെ മുന്നിൽക്കണ്ടുള്ള തയ്യാറെടുപ്പുകൾ, സുരക്ഷയും സേവനവും സമന്വയിപ്പിക്കൽ എന്നീ കാഴ്ചപ്പാടുകളോടെയാണ് ഈ പ്രവർത്തനങ്ങൾ മുന്നോട്ട് കൊണ്ടുപോകുന്നത്.തദ്ദേശീയരായ ജീവനക്കാരെ ശാക്തീകരിക്കുന്നതിലും അതിർത്തി മാനേജ്മെന്റിൽ ആഗോളതലത്തിലുള്ള മികച്ച മാതൃകകൾ സ്വീകരിക്കുന്നതിലും ഊന്നിയുള്ളതാണ് ഈ മികച്ച പ്രകടനം. യാത്രക്കാരുടെ വിശ്വാസം കൂടുതൽ വർദ്ധിപ്പിക്കുന്നതിനും, സുരക്ഷ, എളുപ്പത്തിലുള്ള നടപടിക്രമങ്ങൾ, മനുഷ്യത്വപരമായ ഇടപെടലുകൾ എന്നിവ സംയോജിപ്പിക്കുന്ന ഒരു ആഗോള കവാടം എന്ന നിലയിലുള്ള ദുബായിയുടെ സ്ഥാനം ഊട്ടിയുറപ്പിക്കുന്നതിനും ഈ നടപടികൾ സഹായിക്കുന്നുണ്ടെന്ന് അദ്ദേഹം വിശദീകരിച്ചു
