ദുബൈ: പ്രവാസി കുടുംബങ്ങളിലെ വിദ്യാർഥികൾക്കും രക്ഷിതാക്കൾക്കും വിദ്യാഭ്യാസ-കരിയർ സംബന്ധമായ സംശയങ്ങൾക്ക് കൃത്യവും വിശ്വസനീയവും പ്രൊഫഷണലുമായ മാർഗനിർദേശം നൽകി നിരവധി പേർക്ക് പ്രയോജനകരമായി മാറുകയാണ് ദുബൈ കെ.എം.സി.സി കാസർകോട് ജില്ലാ കമ്മിറ്റിയുടെ ‘ഫ്യൂച്ചർ ക്രാഫ്റ്റ്’ വിദ്യാഭ്യാസ-കരിയർ ഗൈഡൻസ് സെൽ.
വിദ്യാഭ്യാസ മേഖലയിലെ ആശയക്കുഴപ്പങ്ങൾ അകറ്റി വിദ്യാർഥികളുടെ അഭിരുചിക്കും കഴിവിനും അനുയോജ്യമായ പഠന-തൊഴിൽ മേഖലകൾ തിരഞ്ഞെടുക്കാൻ സഹായിക്കുക എന്ന ലക്ഷ്യത്തോടെയാണ് ഈ സംരംഭം ആരംഭിച്ചത്. ഉന്നത വിദ്യാഭ്യാസം, കോഴ്സ് തിരഞ്ഞെടുപ്പ്, കോളേജ്-സർവകലാശാല പ്രവേശനം, വിദ്യാഭ്യാസ സ്ഥാപനങ്ങളെക്കുറിച്ചുള്ള വിവരങ്ങൾ, സ്കോളർഷിപ്പ് അവസരങ്ങൾ, പ്രവേശന പരീക്ഷകൾ, ഇന്ത്യയിലെയും വിദേശ രാജ്യങ്ങളിലെയും തൊഴിൽ സാധ്യതകൾ തുടങ്ങി വിദ്യാഭ്യാസ-കരിയർ മേഖലയിലെ വിവിധ വിഷയങ്ങളിൽ വിദഗ്ധരുടെ നേതൃത്വത്തിൽ മാർഗനിർദേശവും കൗൺസിലിംഗും പദ്ധതിയിലൂടെ ലഭ്യമാക്കുന്നു.
വിദ്യാർഥികളുടെ താൽപര്യം, കഴിവ്, വ്യക്തിത്വം, ഭാവിയിലെ തൊഴിൽ സാധ്യതകൾ എന്നിവ വിലയിരുത്തി അനുയോജ്യമായ പഠനപാത തിരഞ്ഞെടുക്കുന്നതിനുള്ള വ്യക്തിഗത മാർഗനിർദേശവും ഈ സേവനത്തിന്റെ ഭാഗമായി ഒരുക്കിയിട്ടുണ്ട്. അതിവേഗം മാറിക്കൊണ്ടിരിക്കുന്ന വിദ്യാഭ്യാസ-തൊഴിൽ സാഹചര്യത്തിൽ ശരിയായ ദിശാബോധം വിദ്യാർഥികളുടെ ഭാവി വിജയത്തിന് നിർണായകമാണെന്ന തിരിച്ചറിവിലാണ് ദുബൈ കെ.എം.സി.സി കാസർകോട് ജില്ലാ കമ്മിറ്റി ഈ സംരംഭത്തിന് തുടക്കമിട്ടിരിക്കുന്നത്.
വിദ്യാഭ്യാസ-കരിയർ മാർഗനിർദേശ രംഗത്ത് അനുഭവസമ്പത്തുള്ള മുജീബുള്ള കെ. എം., ഡോ. ഷരീഫ് പൊവ്വൽ, ഷംസുദ്ദീൻ പാട്ലടുക്ക, ഡോ. നൗഫിൻ കെ. പി. എന്നിവരാണ് പദ്ധതിയുടെ മാർഗനിർദേശ വിദഗ്ധരായി സേവനം നൽകുന്നത്.
വിദ്യാർഥികൾക്കും രക്ഷിതാക്കൾക്കും വിദ്യാഭ്യാസ-കരിയർ സംബന്ധമായ സംശയങ്ങൾ വാട്സ്ആപ്പ് വഴി എഴുത്തായോ ശബ്ദസന്ദേശമായോ അയയ്ക്കാം. ലഭിക്കുന്ന ചോദ്യങ്ങൾക്ക് വിദഗ്ധർ മറുപടി നൽകും. ആവശ്യാനുസരണം വ്യക്തിഗത വിദ്യാഭ്യാസ-കരിയർ മാർഗനിർദേശ സെഷനുകളും കൗൺസിലിംഗും ഒരുക്കിയിട്ടുണ്ടെന്നും ഭാരവാഹികൾ അറിയിച്ചു.
പ്രവാസി സമൂഹത്തിലെ കൂടുതൽ വിദ്യാർഥികൾക്കും രക്ഷിതാക്കൾക്കും ഈ സേവനം പ്രയോജനപ്പെടുത്തണമെന്ന് ദുബൈ കെ.എം.സി.സി കാസർകോട് ജില്ലാ പ്രസിഡന്റ് സലാം കന്യപ്പാടി, ആക്ടിങ് ജനറൽ സെക്രട്ടറി അഷ്റഫ് ബായാർ, ട്രഷറർ ഡോ. ഇസ്മായിൽ, എജ്യൂസെൽ ചെയർമാൻ സലാം തട്ടാഞ്ചേരി എന്നിവർ അഭ്യർഥിച്ചു.
വിദ്യാഭ്യാസ-കരിയർ സംബന്ധമായ സംശയങ്ങൾക്കും മാർഗനിർദേശത്തിനുമായി താഴെപ്പറയുന്ന വാട്സ്ആപ്പ് നമ്പറുകളിൽ ബന്ധപ്പെടാം:
📱 +971 50 922 0561 | +91 94963 58413
📱 +971 50 857 6548 | +91 99951 06886
