യാത്രാസുഖം വർദ്ധിപ്പിക്കുന്നതിനും പ്രവർത്തനക്ഷമത ഉറപ്പാക്കുന്നതിനുമായി സമഗ്രമായ പ്രതിരോധ അറ്റകുറ്റപ്പണികളുമായി ആർടിഎ.
ദുബായ്, ജൂലൈ 9, 2026: ദുബായ് മെട്രോ ട്രെയിനുകളിലെ വെന്റിലേഷൻ, എയർ കണ്ടീഷനിംഗ് (VAC) സംവിധാനങ്ങൾ പൂർണ്ണമായി നവീകരിക്കുന്നതിനുള്ള വൻകിട പദ്ധതി ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി (RTA) പൂർത്തിയാക്കി. മെട്രോ, ട്രാം ഓപ്പറേറ്റർമാരായ ‘കിയോലിസ് എംഎച്ച്ഐ’ (Keolis MHI) യുമായി സഹകരിച്ച് 62 ട്രെയിനുകളിലാണ് നിലവിൽ അറ്റകുറ്റപ്പണികൾ പൂർത്തിയാക്കിയത്. വേനൽക്കാലത്ത് യാത്രക്കാർക്ക് സുഖകരമായ യാത്ര ഉറപ്പാക്കുകയാണ് പദ്ധതിയുടെ പ്രധാന ലക്ഷ്യം.
ദുബായ് മെട്രോ നെറ്റ്വർക്കിന്റെ ഗുണനിലവാരവും വിശ്വാസ്യതയും വർദ്ധിപ്പിക്കുന്നതിനുള്ള ആർടിഎയുടെ തന്ത്രപരമായ നീക്കങ്ങളുടെ ഭാഗമായാണ് ഈ നവീകരണം. ട്രെയിനുകളുടെ പ്രവർത്തനായുസ്സ് വർദ്ധിപ്പിക്കുക, സുരക്ഷിതമായ യാത്രാ സൗകര്യം ഒരുക്കുക എന്നിവ ലക്ഷ്യമിട്ട് ആധുനിക എഞ്ചിനീയറിംഗ് സാങ്കേതികവിദ്യകളുടെ സഹായത്തോടെയാണ് പദ്ധതി നടപ്പിലാക്കിയത്.
പ്രതിരോധ അറ്റകുറ്റപ്പണികളുടെ ഭാഗമായി എസി സംവിധാനങ്ങളുടെ വിശദമായ പരിശോധനകൾ നടത്തുകയും, കാലാവധി കഴിഞ്ഞ ഭാഗങ്ങൾ മാറ്റിസ്ഥാപിക്കുകയും ചെയ്തിട്ടുണ്ട്. കൃത്യമായ പെർഫോമൻസ് ടെസ്റ്റുകൾക്ക് ശേഷമാണ് ട്രെയിനുകൾ സർവീസിന് സജ്ജമാക്കിയത്. ഇത് എസിയുടെ തണുപ്പിക്കാനുള്ള ശേഷി വർദ്ധിപ്പിക്കാനും, അടിക്കടിയുണ്ടാകുന്ന സാങ്കേതിക തകരാറുകൾ പരിഹരിക്കാനും സഹായിക്കും.
വേനൽക്കാലത്ത് താപനില ഉയരുന്ന സാഹചര്യത്തിൽ എസി സംവിധാനങ്ങൾ കൂടുതൽ കാര്യക്ഷമമായി പ്രവർത്തിക്കേണ്ടത് അത്യാവശ്യമാണ്. ദീർഘകാലാടിസ്ഥാനത്തിലുള്ള അറ്റകുറ്റപ്പണി ചെലവുകൾ കുറയ്ക്കാനും എല്ലാ ദിവസവുമുള്ള സർവീസുകൾ തടസ്സമില്ലാതെ മുന്നോട്ട് കൊണ്ടുപോകാനും ഈ നവീകരണത്തിലൂടെ സാധിക്കുമെന്ന് ആർടിഎ വ്യക്തമാക്കി.
മെട്രോ സർവീസുകളെയോ യാത്രക്കാരെയോ ബാധിക്കാത്ത രീതിയിലാണ് പദ്ധതി നടപ്പിലാക്കിയത്. മെട്രോയുടെ ദൈനംദിന സമയപ്പട്ടികയിൽ മാറ്റം വരുത്താതെ, തിരക്കില്ലാത്ത സമയങ്ങളിലും രാത്രിയിലുമാണ് അറ്റകുറ്റപ്പണികൾ പൂർത്തിയാക്കിയത്. അന്താരാഷ്ട്ര റെയിൽവേ മാനദണ്ഡങ്ങൾ പൂർണ്ണമായും പാലിച്ചായിരുന്നു പ്രവർത്തനങ്ങൾ.
