ദുബായിലെ പൊതുഗതാഗത രംഗത്ത് പുതിയ അധ്യായത്തിന് തുടക്കം കുറിച്ച് റോഡ്സ് ആൻഡ് ട്രാൻസ്പോർട്ട് അതോറിറ്റി (ആർടിഎ). യൂറോപ്യൻ ലോ-കാർബൺ എമിഷൻ സ്റ്റാൻഡേർഡ് ആയ യൂറോ 6 പാലിക്കുന്ന 735 ബസുകളുടെ വൻ കരാറിന്റെ ഭാഗമായി ആദ്യ ഘട്ടത്തിൽ 250 പുതിയ ബസുകളാണ് ആർടിഎയ്ക്ക് കൈമാറിയത്. ഇതിൽ 40 ഇലക്ട്രിക് ബസുകൾ ഉൾപ്പെടുന്നു എന്നതാണ് ശ്രദ്ധേയം. യുഎഇയിൽ ഇതാദ്യമായും ഏറ്റവും വലിയ തോതിലുമുള്ള ഇലക്ട്രിക് ബസ് വിന്യാസമാണിതെന്ന് ആർടിഎ വ്യക്തമാക്കി.
ആർടിഎ ഡയറക്ടർ ജനറലും എക്സിക്യൂട്ടീവ് ഡയറക്ടർമാരുടെ ബോർഡ് ചെയർമാനുമായ മതർ അൽ തായർ പുതിയ Zhongtong ഇലക്ട്രിക് ബസ് നേരിട്ട് പരിശോധിച്ചു. ദുബായിലെ നഗര റൂട്ടുകളിൽ സർവീസ് നടത്തുന്നതിനായി പ്രത്യേകം രൂപകൽപ്പന ചെയ്ത ഈ 12 മീറ്റർ നീളമുള്ള ബസിന് ഒരൊറ്റ ചാർജിൽ 280 കിലോമീറ്റർ വരെ സർവീസ് നടത്താൻ കഴിയും. 434 കിലോവാട്ട്-മണിക്കൂർ ശേഷിയുള്ള ബാറ്ററിയും 360 കിലോവാട്ട് ശേഷിയുള്ള ABB ചാർജറുമാണ് ഇതിന് കരുത്താകുന്നത്. 70 യാത്രക്കാരെ ഉൾക്കൊള്ളുന്ന ബസിൽ 360 ഡിഗ്രി ക്യാമറ സംവിധാനവും അന്താരാഷ്ട്ര സുരക്ഷാ മാനദണ്ഡങ്ങൾ പാലിക്കുന്ന ആധുനിക സംവിധാനങ്ങളും ഒരുക്കിയിട്ടുണ്ട്.
മൂന്ന് മാസത്തിലേറെ ദുബായിൽ നടത്തിയ പരീക്ഷണ ഓട്ടത്തിൽ ബസിന്റെ പ്രവർത്തനക്ഷമതയും ഊർജ ഉപഭോഗ കാര്യക്ഷമതയും മികച്ചതാണെന്ന് തെളിഞ്ഞു. ബ്രേക്കിങ് സിസ്റ്റം, എയർ കണ്ടീഷനിംഗ്, ബാറ്ററി കൂളിംഗ് സംവിധാനം എന്നിവ ഉയർന്ന നിലവാരം പുലർത്തിയതായും റിപ്പോർട്ടുണ്ട്. ഡ്രൈവർമാരുടെയും യാത്രക്കാരുടെയും സംതൃപ്തി നിരക്ക് 95 ശതമാനത്തിലെത്തിയതും ആർടിഎ ചൂണ്ടിക്കാട്ടി. യുഎഇയുടെ കാലാവസ്ഥയ്ക്ക് അനുയോജ്യമായ പ്രത്യേക ബാറ്ററി-കൂളിംഗ് സിസ്റ്റമാണ് ഈ ബസിന്റെ പ്രധാന സവിശേഷത.
പുതിയ ബസുകളുടെ വാങ്ങൽ ദുബായിലെ സുസ്ഥിര ഗതാഗത ലക്ഷ്യങ്ങളുടെ ഭാഗമാണെന്ന് മതർ അൽ തായർ പറഞ്ഞു. ഷെയ്ഖ് മുഹമ്മദ് ബിൻ റാഷിദ് അൽ മക്തൂമിന്റെയും കിരീടാവകാശി ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂമിന്റെയും നിർദേശങ്ങളുടെ അടിസ്ഥാനത്തിൽ, താമസക്കാർക്കും സന്ദർശകർക്കും സൗകര്യപ്രദവും പരിസ്ഥിതി സൗഹൃദവുമായ ഗതാഗത സംവിധാനം ഉറപ്പാക്കുകയാണ് ലക്ഷ്യം. ദുബൈ അർബൻ പ്ലാൻ 2040, ദുബൈ ഇക്കണോമിക് അജണ്ട D33 എന്നിവയുടെ ലക്ഷ്യങ്ങൾ കൈവരിക്കുന്നതിലും ഈ നീക്കം നിർണായകമാണ്.
കരാറിന്റെ ഭാഗമായി 549 സിറ്റി സർവീസ് ബസുകൾ, 76 ഡബിൾ ഡെക്കർ വോൾവോ ബസുകൾ, 70 ആർട്ടിക്കുലേറ്റഡ് ഇസുസു അനഡോലു ബസുകൾ എന്നിവയും ആർടിഎയുടെ ഫ്ലീറ്റിൽ ഉൾപ്പെടും. ഉയർന്ന യാത്രക്കാരുടെ സാന്ദ്രതയുള്ള പ്രദേശങ്ങളിലും പുതിയ നഗര വികസന മേഖലകളിലും മികച്ച സേവനം നൽകുക എന്നതാണ് ഇതിലൂടെ ലക്ഷ്യമിടുന്നത്. ഡ്രൈവർ ബിഹേവിയർ മോണിറ്ററിംഗ്, ഓട്ടോമേറ്റഡ് പാസഞ്ചർ കൗണ്ടിംഗ്, വൈ-ഫൈ, മൊബൈൽ ചാർജിംഗ് പോയിന്റുകൾ, ഭിന്നശേഷിക്കാർക്ക് സൗകര്യപ്രദമായ ലോ-ഫ്ലോർ പ്രവേശനം എന്നിവയും ബസുകളുടെ പ്രത്യേകതകളാണ്.
പൊതു ഗതാഗതത്തെ ദിനസഞ്ചാരത്തിനുള്ള പ്രധാന തിരഞ്ഞെടുപ്പാക്കി മാറ്റുകയും, കാർബൺ പുറന്തള്ളൽ കുറച്ച് 2050ഓടെ കാലാവസ്ഥാ ന്യൂട്രാലിറ്റി കൈവരിക്കുകയുമാണ് ആർടിഎയുടെ ദീർഘകാല ലക്ഷ്യം. ഇലക്ട്രിക്, ഹൈഡ്രജൻ വാഹനങ്ങളിലേക്കുള്ള ഈ മാറ്റം ദുബായുടെ ഭാവി നഗര ദർശനത്തിന്റെ പ്രതിഫലനമാണ്. യാത്രക്കാർ കൂടുതൽ പങ്കാളികളാകുന്ന ഒരു ഹരിത ഗതാഗത സംസ്കാരത്തിലേക്കുള്ള ഈ നീക്കം, നഗരത്തിന്റെ ആഗോള മാതൃകാ സ്ഥാനത്തെ കൂടുതൽ ശക്തിപ്പെടുത്തുമെന്നതിൽ സംശയമില്ല.
