170-ലധികം ശാഖകളുമായി സാന്നിധ്യം ശക്തമാക്കിയ സ്ഥാപനം ദീർഘകാല ജീവനക്കാരെയും ഉപഭോക്താക്കളെയും ആദരിച്ചു; കാർ ഉൾപ്പെടെയുള്ള സമ്മാനങ്ങൾ വിതരണം ചെയ്തു.
അബുദബി — യുഎഇയിലെ ധനകാര്യ, വിദേശനാണ്യ വിനിമയ സേവന രംഗത്ത് 17 വർഷത്തെ പ്രവർത്തനം പൂർത്തിയാക്കി പ്രമുഖ മണി ട്രാൻസ്ഫർ ശൃംഖലയായ ലുലു എക്സ്ചേഞ്ച്. 2009-ൽ കമ്പനി യുഎഇയിലെ തങ്ങളുടെ ആദ്യ കസ്റ്റമർ എൻഗേജ്മെന്റ് സെന്റർ തുറന്ന അബുദബി അൽ വഹ്ദ മാളിൽ വെച്ചാണ് 17-ാം വാർഷിക പരിപാടികൾ സംഘടിപ്പിച്ചത്.
ലുലു ഫിനാൻഷ്യൽ ഹോൾഡിംഗ്സിന്റെ ഉപകമ്പനിയായ ലുലു എക്സ്ചേഞ്ചിന് നിലവിൽ യുഎഇയിലുടനീളം 170-ലധികം ശാഖകളുണ്ട്. മൊബൈൽ ആപ്ലിക്കേഷനായ ‘ലുലു മണി’ വഴിയുള്ള ഡിജിറ്റൽ ഇടപാടുകൾക്കൊപ്പം നേരിട്ടുള്ള ശാഖാ ശൃംഖലയും ഏകോപിപ്പിച്ചാണ് കമ്പനി പ്രവർത്തിക്കുന്നത്.
സ്ഥാപനത്തിന്റെ വാർഷികാഘോഷ ചടങ്ങിൽ ബിസിനസ് പങ്കാളികൾ, മാനേജ്മെന്റ് പ്രതിനിധികൾ, ഉപഭോക്താക്കൾ, ജീവനക്കാർ എന്നിവർ പങ്കെടുത്തു. ഉപഭോക്താക്കളുടെയും ജീവനക്കാരുടെയും പതിറ്റാണ്ടുകളായുള്ള പിന്തുണയാണ് ഈ നേട്ടത്തിന് പിന്നിലെന്ന് ലുലു ഫിനാൻഷ്യൽ ഹോൾഡിംഗ്സ് മാനേജിങ് ഡയറക്ടർ അദീബ് അഹമ്മദ് വ്യക്തമാക്കി.
“ഉപഭോക്താക്കളും ജീവനക്കാരും നൽകിയ വിശ്വാസമാണ് കഴിഞ്ഞ 17 വർഷമായി ലുലു എക്സ്ചേഞ്ചിന്റെ വളർച്ചയ്ക്ക് കരുത്തായത്. സാമ്പത്തിക സേവനങ്ങൾ വേഗത്തിലും സുരക്ഷിതമായും നൽകുന്നതിന് അത്യാധുനിക ഡിജിറ്റൽ സംവിധാനങ്ങളിൽ കമ്പനി നിക്ഷേപം തുടരും,” അദീബ് അഹമ്മദ് പറഞ്ഞു.
സ്ഥാപനത്തിൽ 17 വർഷത്തെ സേവനം പൂർത്തിയാക്കിയ ജീവനക്കാർക്ക് ചടങ്ങിൽ ആദരവ് നൽകി. യുഎഇയിലെ പ്രവാസികൾക്ക് നേരിട്ടുള്ള സേവനങ്ങൾ നൽകുന്നതിൽ ശാഖകൾ വഹിക്കുന്ന പങ്ക് നിർണായകമാണെന്ന് ലുലു എക്സ്ചേഞ്ച് യുഎഇ സിഇഒ തമ്പി സുദർശനൻ ചൂണ്ടിക്കാട്ടി. വ്യക്തിഗത സേവനങ്ങളും ഡിജിറ്റൽ ഇടപാടുകളും ഒരേസമയം മികച്ച രീതിയിൽ മുന്നോട്ട് കൊണ്ടുപോകാനാണ് കമ്പനി മുൻഗണന നൽകുന്നതെന്നും അദ്ദേഹം കൂട്ടിച്ചേർത്തു.
വാർഷികത്തോട് അനുബന്ധിച്ച് സംഘടിപ്പിച്ച വിവിധ പ്രമോഷൻ കാമ്പയിനുകളിലെ വിജയികൾക്കുള്ള സമ്മാനങ്ങളും ചടങ്ങിൽ വിതരണം ചെയ്തു. ‘ലുലു എക്സ്ചേഞ്ച് x ലിവൻ കിക്ക്ഓഫ് റേഡിയോ’ കാമ്പയിനിലെ ഭാഗ്യശാലിയായ വിജയിക്ക് ലിവൻ X6 പ്രോ കാറിന്റെ താക്കോൽ കൈമാറി. ഗ്രൂപ്പ് ഓപ്പറേഷൻസ് & എച്ച്.ആർ ഡയറക്ടർ നാരായൺ പ്രധാൻ, സിഇഒ തമ്പി സുദർശനൻ, ഡെപ്യൂട്ടി സിഇഒ ഷൈജു മോഹൻദാസ് എന്നിവർ ചേർന്ന് സമ്മാനദാനം നിർവഹിച്ചു. ലുലു മണി ഒരുക്കിയ മത്സരത്തിൽ വിജയിച്ച ഉപഭോക്താവിന് അർജന്റീന ദേശീയ ഫുട്ബോൾ ടീം താരങ്ങൾ ഒപ്പിട്ട ഔദ്യോഗിക ജേഴ്സിയും സമ്മാനമായി നൽകി.
യുഎഇ സെൻട്രൽ ബാങ്കിന്റെ നിയന്ത്രണങ്ങൾക്ക് വിധേയമായി പ്രവർത്തിക്കുന്ന ലുലു എക്സ്ചേഞ്ച്, മിഡിൽ ഈസ്റ്റ്, ഏഷ്യ-പസഫിക് രാജ്യങ്ങൾ ഉൾപ്പെടെയുള്ള അന്താരാഷ്ട്ര വിപണികളിൽ പ്രവർത്തിക്കുന്ന ലുലു ഫിനാൻഷ്യൽ ഹോൾഡിംഗ്സിന്റെ പ്രധാന ബിസിനസ് വിഭാഗമാണ്.
