ദുബൈ: കേരള രാഷ്ട്രീയത്തിലും ഇന്ത്യൻ രാഷ്ട്രീയത്തിലും തനതായ വ്യക്തിമുദ്ര പതിപ്പിച്ച സമാനതകളില്ലാത്ത നേതാവായിരുന്നു എം.പി. വീരേന്ദ്രകുമാറെന്ന് ഷാർജ ഇന്ത്യൻ അസോസിയേഷൻ മുൻ പ്രസിഡന്റ് അഡ്വ. വൈ.എ. റഹീം അഭിപ്രായപ്പെട്ടു. യു.എ.ഇ ജനതാ കൾച്ചറൽ സെന്റർ സംഘടിപ്പിച്ച എം.പി. വീരേന്ദ്രകുമാർ അനുസ്മരണ സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ദുബായിലെ തമ്മർ ഇൻ ഹോട്ടലിൽ സംഘടിപ്പിച്ച പരിപാടിയിൽ ജനതാ കൾച്ചറൽ സെന്റർ പ്രസിഡന്റ് പി.ജി. രാജേന്ദ്രൻ അധ്യക്ഷത വഹിച്ചു. ടെന്നിസൻ ചേന്നപ്പള്ളി സ്വാഗതം പറഞ്ഞു.
എം പി വിരേന്ദ്രകുമാർ രാഷ്ട്രീയ നേതാവ് എന്നതിലുപരി സോഷ്യലിസ്റ്റ് ആശയങ്ങളെ ചേർത്തുവച്ചുകൊണ്ട് ഇന്ത്യൻ സാമൂഹിക രാഷ്ട്രീയ സാഹചര്യങ്ങളെ ദീർഘവീക്ഷണത്തോടെ നിരീക്ഷിച്ച എഴുത്തുകാരൻ കൂടിയായിരുന്നു. മൂന്നു പതിറ്റാണ്ടുകൾക്ക് മുമ്പ് അദ്ദേഹം എഴുതിയ രാമന്റെ ദുഃഖം എന്ന പുസ്തകം ഇപ്പോൾ വായിക്കുമ്പോൾ സമീപകാല ഇന്ത്യയിൽ സംഭവിച്ചുകൊണ്ടിരിക്കുന്ന ഹിന്ദുത്വവൽക്കരണവും ജനാധിപത്യവിരുദ്ധ രാഷ്ട്രീയ സമീപനങ്ങളും മതേതരത്തിന് ഏറ്റ പരിക്കുകളെയും മുൻകൂട്ടി കാണാൻ കഴിഞ്ഞ എഴുത്തുകാരനാണ് വീരേന്ദ്രകുമാർ. രാഷ്ട്രീയ നേതാവ് എന്നതിനപ്പുറം എഴുത്തുകാരൻ എന്ന രീതിയിൽ ഇപ്പോഴും ഇന്ത്യൻ സാമൂഹ്വാവസ്ഥയോട് പുസ്തകങ്ങളിലൂടെ പ്രതികരിച്ചു കൊണ്ടിരിക്കുകയാണ് എം പി വിരേന്ദ്രകുമാർ എന്ന് അനുസ്മരണ പ്രഭാഷണം നടത്തിയ ഇ കെ ദിനേശൻ പറഞ്ഞു.
ചടങ്ങിൽ ജനതാ കൾച്ചറൽ സെൻ്റർ ഓവർസീസ് പ്രസിഡണ്ട് ടി ജെ ബാബു, ബിജു സോമൻ, പ്രഭാകരൻ പയ്യന്നൂർ, കവി കെ ഗോപിനാഥൻ, ദിവ്യമണി, ഒ പി വിശ്വംഭരൻ, പ്രജിത്ത് ലാൽ, ഹരിലാൽ എന്നിവർ സംസാരിച്ചു. മണി നന്ദി പറഞ്ഞു.
