യു.എ.ഇയിൽ നിന്നും മെന (MENA) മേഖലയിൽ നിന്നുമുള്ള മികച്ച പരിസ്ഥിതി സൗഹൃദ യാത്രാ പദ്ധതികൾക്ക് അപേക്ഷിക്കാം; അവാർഡുകൾ 12 വിഭാഗങ്ങളിൽ.
ദുബായ്: ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (ആർ.ടി.എ) സംഘടിപ്പിക്കുന്ന പതിനാലാമത് ‘ദുബായ് അവാർഡ് ഫോർ സസ്റ്റൈനബിൾ ട്രാൻസ്‌പോർട്ട്’ (DAST) 2026-ന് പ്രവാസി മേഖലകളിൽ നിന്നും പ്രാദേശിക തലങ്ങളിൽ നിന്നും മികച്ച പ്രതികരണം. മിഡിൽ ഈസ്റ്റ്, നോർത്ത് ആഫ്രിക്ക (MENA) മേഖലയിലെ സുസ്ഥിര ഗതാഗത വികസനത്തിനും നൂതന ആശയങ്ങൾക്കുമുള്ള ഏറ്റവും വലിയ പ്ലാറ്റ്‌ഫോമായി ഈ പുരസ്‌കാരം മാറിയതായി അധികൃതർ വ്യക്തമാക്കി. അവാർഡിനായുള്ള നാമനിർദേശ പത്രികകൾ സമർപ്പിക്കേണ്ട അവസാന തീയതി 2026 ജൂലൈ 31 വെള്ളിയാഴ്ചയാണ്.
അർഹരായ സർക്കാർ, അർദ്ധ സർക്കാർ, സ്വകാര്യ സ്ഥാപനങ്ങൾക്കും സർവ്വകലാശാലകൾക്കും സ്കൂളുകൾക്കും തങ്ങളുടെ സുസ്ഥിര ഗതാഗത പദ്ധതികൾ പ്രദർശിപ്പിച്ചുകൊണ്ട് ഇതിൽ പങ്കാളികളാകാം. സമയപരിധി അവസാനിക്കാൻ ആഴ്ചകൾ മാത്രം ബാക്കിനിൽക്കെ, താല്പര്യമുള്ളവർ രജിസ്ട്രേഷൻ നടപടികൾ വേഗത്തിലാക്കണമെന്ന് ആർ.ടി.എ ഓർമ്മിപ്പിച്ചു.
നൂതനമായ ആശയങ്ങൾ പങ്കുവെക്കാനും പരിസ്ഥിതി സൗഹൃദ യാത്രാ സംവിധാനങ്ങളിലെ മികച്ച മാതൃകകൾ ലോകത്തിന് മുന്നിൽ അവതരിപ്പിക്കാനുമുള്ള മികച്ച അവസരമാണ് ഈ അവാർഡെന്ന് ആർ.ടി.എ സ്ട്രാറ്റജി ആൻഡ് കോർപ്പറേറ്റ് ഗവേണൻസ് സെക്ടർ സി.ഇ.ഒയും അവാർഡ് ഓർഗനൈസിംഗ് കമ്മിറ്റി ചെയർപേഴ്‌സണുമായ മുനാ അൽ ഒസൈമി പറഞ്ഞു. വിവിധ മേഖലകളിൽ നിന്ന് ലഭിക്കുന്ന വലിയ പങ്കാളിത്തം പുരസ്‌കാരത്തിന്റെ വിശ്വാസ്യതയെയാണ് കാണിക്കുന്നതെന്നും അവർ കൂട്ടിച്ചേർത്തു.
നൂതന സാങ്കേതികവിദ്യകളെ പ്രോത്സാഹിപ്പിക്കുന്നതിനായി ഇത്തവണ അവാർഡ് ഘടനയിൽ വലിയ മാറ്റങ്ങളാണ് വരുത്തിയിരിക്കുന്നത്. ആകെ പുരസ്‌കാരങ്ങളുടെ എണ്ണം 12 ആയി ഉയർത്തി. പ്രധാനമായും നാല് വിഭാഗങ്ങളിലായാണ് അവാർഡുകൾ നിശ്ചയിച്ചിരിക്കുന്നത്:
- സസ്റ്റൈനബിലിറ്റി (Sustainability): പയനിയറിംഗ് സസ്റ്റൈനബിൾ സിറ്റീസ് അവാർഡ്, ഔട്ട്സ്റ്റാൻഡിംഗ് സസ്റ്റൈനബിൾ ഫ്ലീറ്റ് അവാർഡ്, ക്ലീൻ എനർജി ഫോർ മൊബിലിറ്റി അവാർഡ്, അർബൻ ചേഞ്ച്മേക്കേഴ്സ് അവാർഡ്.
- ഇൻക്ലൂസിവിറ്റി (Inclusivity): അർബൻ ഫ്ലോ ഇംപ്രൂവ്‌മെന്റ് അവാർഡ്, സേഫ് ട്രാൻസ്‌പോർട്ട് അവാർഡ്, ഫസ്റ്റ് ആൻഡ് ലാസ്റ്റ് മൈൽ അവാർഡ്, ട്രാൻസ്‌പോർട്ട് ഫോർ ഓൾ അവാർഡ്.
- ഇന്നൊവേഷൻ (Innovation): ബെസ്റ്റ് ഇന്നൊവേഷൻ ഇൻ ട്രാൻസ്‌പോർട്ട് അവാർഡ്, ഔട്ട്സ്റ്റാൻഡിംഗ് സ്റ്റുഡന്റ് സൊല്യൂഷൻസ് അവാർഡ്, നെക്സ്റ്റ് ജെൻ ഫോർ മൊബിലിറ്റി അവാർഡ്.
- എലൈറ്റ് (Elite): എല്ലാ വിഭാഗങ്ങളിലെയും ഏറ്റവും മികച്ച പ്രകടനത്തിന് നൽകുന്ന പരമോന്നത പുരസ്‌കാരം.
2008-ൽ ആരംഭിച്ച ഈ പുരസ്‌കാരം, ഗതാഗത മേഖലയിലെ ദ്രുതഗതിയിലുള്ള മാറ്റങ്ങൾക്കും ഹരിത ഊർജ്ജ പദ്ധതികൾക്കും അനുസൃതമായി ഓരോ വർഷവും നവീകരിക്കപ്പെടുന്നുണ്ട്. ഇത് ദുബായിയെ ആഗോള സുസ്ഥിര ഗതാഗതത്തിന്റെ ഹബ്ബാക്കി മാറ്റുന്നതിൽ പ്രധാന പങ്കുവഹിക്കുന്നു.
ഡിജിറ്റൽ ഗവേണൻസ് നയങ്ങളുടെ ഭാഗമായി പൂർണ്ണമായും സ്മാർട്ട് സംവിധാനത്തിലൂടെയാണ് അപേക്ഷകൾ സ്വീകരിക്കുന്നത്. വളരെ ലളിതമായ ഘട്ടങ്ങളിലൂടെ സ്ഥാപനങ്ങൾക്കും വിദ്യാർത്ഥികൾക്കും വെബ്‌സൈറ്റ് വഴി രജിസ്റ്റർ ചെയ്യാം. കൂടുതൽ വിവരങ്ങൾക്കും രജിസ്ട്രേഷനുമായി https://www.rta.ae/wps/portal/rta/ae/home/dast എന്ന ഔദ്യോഗിക പോർട്ടൽ സന്ദർശിക്കുക.
