അഞ്ചാമത് പതിപ്പിൽ അറബ്, അന്താരാഷ്ട്ര പ്രസാധകരും വിതരണക്കാരും തമ്മിൽ നിർണായക ധാരണകൾ; വിതരണ ശൃംഖലകളും ഡിജിറ്റൽ പരിവർത്തനവും ചർച്ചയായി.
ഷാർജ, സെപ്റ്റംബർ 21, 2026 :ആഗോളതലത്തിൽ പുസ്തക വിതരണരംഗം നേരിടുന്ന പ്രതിസന്ധികൾക്ക് പരിഹാരം കാണാനും പുതിയ വിപണികളിലേക്ക് വ്യാപാര പങ്കാളിത്തം വ്യാപിപ്പിക്കാനുമായി പ്രമുഖ പ്രസാധകരും വിതരണക്കാരും ഷാർജയിൽ ഒത്തുചേർന്നു. ഷാർജ ബുക്ക് അതോറിറ്റി (എസ്.ബി.എ) സംഘടിപ്പിക്കുന്ന അഞ്ചാമത് ഷാർജ ബുക്ക്‌സെല്ലേഴ്‌സ് കോൺഫറൻസിലാണ് അന്താരാഷ്ട്ര പുസ്തക വിപണിയുടെ ഭാവി സാധ്യതകൾ ചർച്ചയാകുന്നത്.
യു.എ.ഇ, അറബ് രാജ്യങ്ങൾ, ഏഷ്യ, യൂറോപ്പ്, അമേരിക്ക എന്നിവിടങ്ങളിൽ നിന്നുള്ള പുസ്തകശാലാ ഉടമകൾ, പ്രസാധകർ, രാജ്യാന്തര സെയിൽസ് എക്സിക്യൂട്ടീവുകൾ, സോഫ്റ്റ്‌വെയർ രംഗത്തെ പ്രമുഖർ എന്നിവരാണ് കോൺഫറൻസിൽ പങ്കെടുക്കുന്നത്. പ്രാദേശിക വിപണികളുടെ അതിരുകൾ കടന്ന് വായനക്കാരിലേക്ക് പുസ്തകങ്ങൾ എത്തിക്കുന്നതിനുള്ള പ്രായോഗിക തന്ത്രങ്ങൾ രൂപീകരിക്കുകയാണ് ഈ വാണിജ്യ സംഗമത്തിന്റെ പ്രധാന ലക്ഷ്യം.
പുസ്തക പ്രസാധന രംഗത്ത് വിതരണ ശൃംഖല നേരിടുന്ന സങ്കീർണ്ണതകൾ ലഘൂകരിക്കാൻ ഇത്തരം രാജ്യാന്തര വേദികൾ അനിവാര്യമാണെന്ന് പ്രസാധകർ ചൂണ്ടിക്കാട്ടുന്നു. തങ്ങളുടെ പുസ്തകങ്ങൾ പുറംരാജ്യങ്ങളിലെ വായനക്കാരിലേക്ക് എത്തിക്കാൻ പരിചയസമ്പന്നരായ വിതരണക്കാരുമായി നേരിട്ട് കൈകോർക്കാൻ ഷാർജ അവസരമൊരുക്കുന്നതായി സൗദി അറേബ്യൻ പ്രസാധക സ്ഥാപനമായ ഗുസ്സൂർ ദാനയുടെ സ്ഥാപകൻ അബ്ദുൽ അസീസ് അൽ മുതൈരി വ്യക്തമാക്കി. “പ്രസാധകർക്ക് വിതരണത്തിന്റെ എല്ലാ ഘട്ടങ്ങളും ഒറ്റയ്ക്ക് കൈകാര്യം ചെയ്യാനാകില്ല. വായനക്കാരിലേക്ക് പുസ്തകങ്ങൾ നേരിട്ടെത്തിക്കാൻ വിതരണക്കാരുടെ സേവനം പ്രയോജനപ്പെടുത്തുന്നത് വഴി പ്രസാധകർക്ക് ഉള്ളടക്കത്തിലും ഗുണനിലവാരത്തിലും കൂടുതൽ ശ്രദ്ധ കേന്ദ്രീകരിക്കാൻ സാധിക്കും,” അദ്ദേഹം പറഞ്ഞു.
അന്താരാഷ്ട്ര പ്രസാധക ഭീമന്മാരും പശ്ചിമേഷ്യൻ വിപണിയിലെ തങ്ങളുടെ സാന്നിധ്യം വിപുലമാക്കാൻ ഈ വേദി ഉപയോഗപ്പെടുത്തുന്നുണ്ട്. പുതിയ ബിസിനസ് പങ്കാളികളെ കണ്ടെത്തുന്നതിനൊപ്പം വർഷങ്ങളായുള്ള വിപണി സൗഹൃദങ്ങൾ പുതുക്കാനും ഷാർജയിലെ സംഗമം വഴിയൊരുക്കുന്നതായി യു.എസിലെ ഹാഷെറ്റ് ബുക്ക് ഗ്രൂപ്പ് ഇന്റർനാഷണൽ സെയിൽസ് വൈസ് പ്രസിഡന്റ് ഷോൺ എബ്രഹാം പറഞ്ഞു.
അറബ് മേഖലയിലെ പ്രത്യേക വിതരണ വെല്ലുവിളികൾ പരിഹരിക്കുന്നതിന് യോജിച്ച വിതരണ കമ്പനി എന്ന ആശയവും കോൺഫറൻസിലെ വിവിധ സെഷനുകളിൽ ഉയർന്നുവന്നു. നേരിട്ടുള്ള വിപണി അനുഭവങ്ങളുള്ള വിദഗ്ധർ ചർച്ചകൾക്ക് നേതൃത്വം നൽകുന്നത് പ്രായോഗിക പരിഹാരങ്ങൾ കണ്ടെത്താൻ സഹായിക്കുമെന്ന് ലെബനനിലെ ദാർ അൽ റാഫിദൈൻ ഡയറക്ടർ മുഹമ്മദ് ഹാദി അഭിപ്രായപ്പെട്ടു.
ഓൺലൈൻ പുസ്തക വിൽപ്പനയും ഡിജിറ്റൽ സംവിധാനങ്ങളും വ്യാപകമാകുന്ന പശ്ചാത്തലത്തിൽ, വിവിധ രാജ്യങ്ങളിലെ സാങ്കേതിക മുന്നേറ്റങ്ങൾ പങ്കുവെക്കപ്പെടുന്നതും ശ്രദ്ധേയമാണ്. പുസ്തക വിൽപ്പനയിൽ ആധുനിക ഡിജിറ്റൽ പ്ലാറ്റ്‌ഫോമുകൾ ഉപയോഗപ്പെടുത്തുന്ന രീതികളെക്കുറിച്ച് വിശദമായ ധാരണ ലഭിക്കാൻ അന്താരാഷ്ട്ര സംവാദങ്ങൾ സഹായകരമാണെന്ന് ഇന്ത്യയിൽ നിന്നുള്ള സ്പ്രിംഗ് ടൈം സോഫ്റ്റ്‌വെയർ സൊല്യൂഷൻസ് സ്ഥാപകനും സി.ഇ.ഒയുമായ ചന്ദർ ശേഖർ ചൂണ്ടിക്കാട്ടി.
വിവിധ രാജ്യങ്ങളിലെ വിജയകരമായ വിപണന മാതൃകകൾ തങ്ങളുടെ മേഖലകളിൽ എങ്ങനെ പ്രയോജനപ്പെടുത്താമെന്ന അന്വേഷണത്തിലാണ് കോൺഫറൻസിൽ പങ്കെടുക്കുന്ന പ്രതിനിധികൾ. ലബനീസ് പ്രസാധകരായ ദാർ സുവാലിന്റെ ജനറൽ മാനേജർ ഇഹാബ് മുഹമ്മദ്, ജോർദാനിലെ അലിഫ് ബാ താ പബ്ലിഷിംഗ് മാനേജർ മുനിസ് ഹത്താബ് തുടങ്ങിയവരും ആഗോള അനുഭവങ്ങൾ പ്രാദേശിക തലത്തിൽ നടപ്പാക്കേണ്ടതിന്റെ പ്രാധാന്യം വ്യക്തമാക്കി. സോഷ്യൽ മീഡിയ വഴിയുള്ള പ്രചാരണവും ആധുനിക ബുക്ക് സ്റ്റോർ മാനേജ്‌മെന്റും വഴി അറബ് പുസ്തകങ്ങൾക്ക് കൂടുതൽ വിപണി കണ്ടെത്താനാകുമെന്നാണ് പ്രസാധക സമൂഹത്തിന്റെ പ്രതീക്ഷ.
