ഷാർജയിലെ നിക്ഷേപ സാധ്യതകൾ പങ്കുവെക്കുന്നതിനും സാമ്പത്തിക സഹകരണം ശക്തമാക്കുന്നതിനുമായി വിപുലമായ ബിസിനസ് നെറ്റ്‌വർക്കിങ് സംഗമം നടന്നു.
ഷാർജ, ജൂലൈ 2, 2026: യുഎഇ, ബ്രസീൽ, പോർച്ചുഗൽ എന്നീ രാജ്യങ്ങളിൽ നിന്നുള്ള പ്രമുഖ ബിസിനസ്സ് നേതാക്കളെയും നിക്ഷേപകരെയും സാമ്പത്തിക സ്ഥാപനങ്ങളെയും ഒരുമിച്ച് അണിനിരത്തി ഷാർജയിൽ ‘ബിസിനസ് & പാഡിൽ ഡേ 2026’ വിജയകരമായി സംഘടിപ്പിച്ചു. പുതിയ നിക്ഷേപ സാധ്യതകൾ പര്യവേക്ഷണം ചെയ്യുന്നതിനും സംയുക്ത സംരംഭങ്ങൾ വ്യാപിപ്പിക്കുന്നതിനുമായാണ് ഷാർജ എഫ്ഡിഐ ഓഫീസ് (ഇൻവെസ്റ്റ് ഇൻ ഷാർജ) ഈ പരിപാടി സംഘടിപ്പിച്ചത്.
അറബ്-ബ്രസീലിയൻ ചേംബർ ഓഫ് കൊമേഴ്സ് (CCAB), ഷാർജയിലെ പോർച്ചുഗീസ് ബിസിനസ് കൗൺസിൽ എന്നിവയുമായി സഹകരിച്ചാണ് ഇൻവെസ്റ്റ് ഇൻ ഷാർജ ഈ അനൗപചാരിക നെറ്റ്‌വർക്കിങ് സംഗമം ഒരുക്കിയത്. നിലവിൽ 193 ബ്രസീലിയൻ കമ്പനികളും 267 പോർച്ചുഗീസ് കമ്പനികളും ഷാർജയിലെ ഫ്രീ സോണുകളിലും മെയിൻലാൻഡിലുമായി പ്രവർത്തിക്കുന്നുണ്ട്. ലാറ്റിൻ അമേരിക്കയിൽ യുഎഇയുടെ ഏറ്റവും വലിയ വ്യാപാര പങ്കാളിയായ ബ്രസീൽ, 2025-ൽ മാത്രം 3.78 ബില്യൺ യുഎസ് ഡോളറിന്റെ ഉൽപ്പന്നങ്ങളാണ് യുഎഇയിലേക്ക് കയറ്റുമതി ചെയ്തത്.
ഷാർജ ഗവൺമെന്റ് റിലേഷൻസ് ഡിപ്പാർട്ട്‌മെന്റ് (ഡിജിആർ) ചെയർമാൻ ഷെയ്ഖ് ഫാഹിം അൽ ഖാസിമി, ഷാർജ സ്പോർട്സ് കൗൺസിൽ ചെയർമാൻ ഷെയ്ഖ് ഡോ. ഖാലിദ് ബിൻ ഹുമൈദ് അൽ ഖാസിമി, ഷാർജ ഇൻവെസ്റ്റ്‌മെന്റ് ആൻഡ് ഡെവലപ്‌മെന്റ് അതോറിറ്റി (ഷുറൂഖ്) സിഇഒ അഹമ്മദ് ഉബൈദ് അൽ ഖസീർ, ഇൻവെസ്റ്റ് ഇൻ ഷാർജ സിഇഒ മുഹമ്മദ് ജുമാ അൽ മുഷറഖ് തുടങ്ങിയ പ്രമുഖർ ചടങ്ങിൽ പങ്കെടുത്തു.
ഷാർജയുടെ സമ്പദ്‌വ്യവസ്ഥ നിലവിൽ 145 ബില്യൺ ദിർഹം മൂല്യമുള്ളതാണെന്നും ഇത് യുഎഇയുടെ ആകെ സമ്പദ്‌വ്യവസ്ഥയുടെ 10 ശതമാനത്തോളം വരുമെന്നും ഷെയ്ഖ് ഫാഹിം അൽ ഖാസിമി വ്യക്തമാക്കി. കിഴക്കൻ തീരത്തെ തന്ത്രപ്രധാനമായ തുറമുഖങ്ങളും മികച്ച ലോജിസ്റ്റിക്സ് ശൃംഖലയും ഷാർജയെ ആഗോള നിക്ഷേപകരുടെ പ്രിയപ്പെട്ട കേന്ദ്രമാക്കുന്നു. ഷാർജയിലെ ലോജിസ്റ്റിക്സ് മേഖല പ്രതിവർഷം 10% വളർച്ചയാണ് കൈവരിക്കുന്നതെന്നും അദ്ദേഹം കൂട്ടിച്ചേർത്തു.
പരമ്പരാഗത ബോർഡ് റൂമുകൾക്ക് പുറത്ത് നടക്കുന്ന ഇത്തരം അനൗപചാരിക ഒത്തുചേരലുകൾ കൂടുതൽ സുദൃഢമായ ബിസിനസ്സ് ബന്ധങ്ങൾക്ക് വഴിയൊരുക്കുമെന്ന് ഷുറൂഖ് സിഇഒ അഹമ്മദ് ഉബൈദ് അൽ ഖസീർ പറഞ്ഞു. കായികരംഗത്തെ ഒരു സോഫ്റ്റ് പവർ ആയി ഉപയോഗിച്ച് ബിസിനസ്സ് സമൂഹത്തെ പരസ്പരം ബന്ധിപ്പിക്കുന്നതിനായി സംഘടിപ്പിച്ച പാഡിൽ ടൂർണമെന്റോടെയാണ് പരിപാടി സമാപിച്ചത്.
