ജി.സി.സി രാജ്യങ്ങളുടെ പ്രതിരോധ സഹകരണവും സൈനിക സജ്ജതയും ഉറപ്പുവരുത്തി മനാമയിൽ വൻപയറ്റ്; പ്രമുഖ പ്രാദേശിക നേതാക്കളും ഉന്നത ഉദ്യോഗസ്ഥരും പങ്കെടുത്തു.
മനാമ: യു.എ.ഇ ഉപപ്രധാനമന്ത്രിയും പ്രതിരോധ മന്ത്രിയും ദുബായ് കിരീടാവകാശിയുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തും ബഹ്റൈൻ രാജാവ് ഹമദ് ബിൻ ഈസ അൽ ഖലീഫയുമായി മനാമയിൽ കൂടിക്കാഴ്ച നടത്തി. ഔദ്യോഗിക സന്ദർശനത്തിനായി ബഹ്റൈനിലെത്തിയ ഷെയ്ഖ് ഹംദാൻ, ബഹ്റൈൻ ഡിഫൻസ് ഫോഴ്സ് സംഘടിപ്പിച്ച ‘ബഹ്റൈൻ ഷീൽഡ്’ സംയുക്ത സൈനിക അഭ്യാസത്തിന് സാക്ഷ്യം വഹിച്ചു.
ജി.സി.സി അംഗരാജ്യങ്ങളുടെ പ്രതിരോധ ശേഷിയും സഹകരണവും കൂടുതൽ ശക്തമാക്കുന്നതിന്റെ ഭാഗമായാണ് ‘ബഹ്റൈൻ ഷീൽഡ്’ പയറ്റ് സംഘടിപ്പിച്ചത്. മുഹമ്മദ് ബിൻ സായിദ് സ്ക്വാഡ്രൺ, യു.എ.ഇ സായുധ സേനയുടെ കിംഗ് ഹമദ് ബ്രിഗേഡ്, പെനിൻസുല ഷീൽഡ് ഫോഴ്സ്, സൗദി അറേബ്യൻ സൈനിക വിഭാഗങ്ങൾ എന്നിവയും മറ്റ് ജി.സി.സി രാജ്യങ്ങളിലെ സേനാവിഭാഗങ്ങളും അഭ്യാസത്തിൽ പങ്കെടുത്തു.
അഭ്യാസത്തിന്റെ വിവിധ ഘട്ടങ്ങളെക്കുറിച്ചും തന്ത്രപ്രധാനമായ പ്രവർത്തന രീതികളെക്കുറിച്ചും ഇരുനേതാക്കൾക്കും സൈനിക മേധാവികൾ വിശദീകരിച്ചു നൽകി. അടിയന്തര സാഹചര്യങ്ങളെ നേരിടാനും സംയുക്ത കമാൻഡ് സംവിധാനങ്ങൾ കൂടുതൽ കാര്യക്ഷമമാക്കാനും ലക്ഷ്യമിട്ടുള്ള പ്രാക്ടിക്കൽ ഡ്രില്ലുകളാണ് നടന്നത്.
യു.എ.ഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ, വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തും എന്നിവരുടെ ആശംസകൾ ഷെയ്ഖ് ഹംദാൻ ബഹ്റൈൻ രാജാവിന് കൈമാറി. മേഖലയിലെ നിലവിലെ സുരക്ഷാ സാഹചര്യങ്ങളും പ്രതിരോധ രംഗത്തെ ഉഭയകക്ഷി സഹകരണവും കൂടിക്കാഴ്ചയിൽ ചർച്ചയായി.
മേഖലയുടെ സുരക്ഷ നിലനിർത്തുന്നതിൽ ജി.സി.സി കൂട്ടായ്മയുടെ പങ്ക് നിർണായകമാണെന്ന് ബഹ്റൈൻ രാജാവ് പറഞ്ഞു. യു.എ.ഇ സേനയുടെ പങ്കാളിത്തത്തെയും മികച്ച പ്രകടനത്തെയും അദ്ദേഹം പ്രശംസിച്ചു.
സേനകളുടെ പ്രവർത്തനക്ഷമതയും പങ്കെടുത്ത വിഭാഗങ്ങളുടെ തയ്യാറെടുപ്പും ഏറെ പ്രശംസനീയമാണെന്ന് ഷെയ്ഖ് ഹംദാൻ ചൂണ്ടിക്കാട്ടി. ഗൾഫ് മേഖലയിൽ സമാധാനവും സുസ്ഥിരതയും ഉറപ്പാക്കാൻ ഇരുരാജ്യങ്ങളും തമ്മിലുള്ള തന്ത്രപ്രധാന ബന്ധം അത്യാവശ്യമാണെന്ന് അദ്ദേഹം വ്യക്തമാക്കി.
ബഹ്റൈൻ നാഷണൽ സെക്യൂരിറ്റി അഡ്വൈസറും റോയൽ ഗാർഡ് കമാൻഡറുമായ ലെഫ്റ്റനന്റ് ജനറൽ ഷെയ്ഖ് നാസർ ബിൻ ഹമദ് അൽ ഖലീഫ, റോയൽ ഗാർഡ് സ്പെഷ്യൽ ഓപ്പറേഷൻസ് കമാൻഡർ ബ്രിഗേഡിയർ ഷെയ്ഖ് ഖാലിദ് ബിൻ ഹമദ് അൽ ഖലീഫ എന്നിവർ ചടങ്ങിൽ പങ്കെടുത്തു.
യു.എ.ഇ ആർട്ടിഫിഷ്യൽ ഇന്റലിജൻസ് സംസ്ഥാന മന്ത്രി ഉമർ ബിൻ സുൽത്താൻ അൽ ഒലാമ, യു.എ.ഇ സായുധ സേനാ ചീഫ് ഓഫ് സ്റ്റാഫ് ലെഫ്റ്റനന്റ് ജനറൽ ഈസ സെയ്ഫ് ബിൻ അബ്ലാൻ അൽ മസ്രൂയി ഉൾപ്പെടെയുള്ള ഉന്നതതല പ്രതിനിധി സംഘവും ഷെയ്ഖ് ഹംദാനോടൊപ്പം ഉണ്ടായിരുന്നു.
