ഷാർജയിലെ പ്രകൃതിരമണീയവും പൈതൃകപ്രാധാന്യമുള്ളതുമായ ഏഴ് റിട്രീറ്റുകളുടെ മേൽനോട്ടം ഇനി ആഗോള ഹോസ്പിറ്റാലിറ്റി ഗ്രൂപ്പ് നിർവഹിക്കും.
ഷാർജ, ജൂലൈ 3, 2026: ഷാർജ ഇൻവെസ്റ്റ്‌മെന്റ് ആൻഡ് ഡെവലപ്‌മെന്റ് അതോറിറ്റിയും (ഷുറൂഖ്) പ്രമുഖ അന്താരാഷ്ട്ര ഹോസ്പിറ്റാലിറ്റി ഗ്രൂപ്പായ മൈനർ ഹോട്ടൽസും തന്ത്രപ്രധാനമായ പങ്കാളിത്ത കരാറിൽ ഒപ്പുവെച്ചു. ഷാർജയിലെ പ്രകൃതി സൗഹൃദവും പൈതൃക മൂല്യമുള്ളതുമായ ഏഴ് റിട്രീറ്റുകൾ ഉൾപ്പെടുന്ന ‘ഷാർജ കളക്ഷന്റെ’ മാനേജ്‌മെന്റ്, ഓപ്പറേഷൻസ് ചുമതലകൾ ഇനി മൈനർ ഹോട്ടൽസ് നിർവഹിക്കും.
ഷാർജ ഹൗസ് ഓഫ് വിസ്ഡമിലെ അൽ റഷീദ് ഹാളിൽ നടന്ന ചടങ്ങിൽ ഷുറൂഖ് ചെയർപേഴ്‌സൺ ഷെയ്ഖ ബോദൂർ ബിന്ത് സുൽത്താൻ അൽ ഖാസിമിയുടെ സാന്നിധ്യത്തിലാണ് കരാർ ഒപ്പിട്ടത്. ഷുറൂഖ് സി.ഇ.ഒ അഹമ്മദ് ഉബൈദ് അൽ ഖസീർ, മൈനർ ഹോട്ടൽസ് മിഡിൽ ഈസ്റ്റ് ആൻഡ് ആഫ്രിക്ക ചീഫ് ഓപ്പറേറ്റിംഗ് ഓഫീസർ അമീർ ഗോൽബർഗ് എന്നിവർ കരാറിൽ ഒപ്പുവെച്ചു. മൈനർ ഇന്റർനാഷണൽ സ്ഥാപകനും ചെയർമാനുമായ വില്യം ഹൈനെക്കും ചടങ്ങിൽ പങ്കെടുത്തു.
ഈ പങ്കാളിത്തത്തിലൂടെ മൈനർ ഹോട്ടൽസിന്റെ ആഗോള ഹോസ്പിറ്റാലിറ്റി ശൃംഖലയും പ്രവർത്തന മികവും ഷാർജ കളക്ഷന് ലഭ്യമാകും. അൽ ബദായർ റിട്രീറ്റ്, അൽ ഫായ റിട്രീറ്റ്, കിംഗ്ഫിഷർ റിട്രീറ്റ്, മൂൺ റിട്രീറ്റ്, നജ്ദ് അൽ മഖ്സർ, അൽ റയാഹീൻ റിട്രീറ്റ്, നൊമാഡ് എന്നീ ഏഴ് റിട്രീറ്റുകളാണ് ഷാർജ കളക്ഷനിലുള്ളത്. 66 രാജ്യങ്ങളിലായി 640-ലധികം ഹോട്ടലുകളും റിസോർട്ടുകളും നടത്തുന്ന ലോകത്തിലെ മുൻനിര ഗ്രൂപ്പാണ് മൈനർ ഹോട്ടൽസ്.
ഷാർജയുടെ സാംസ്കാരിക സ്വത്വവും സുസ്ഥിര വികസന തത്വങ്ങളും കാത്തുസൂക്ഷിച്ചുകൊണ്ട് തന്നെ ഷാർജ കളക്ഷന്റെ അന്താരാഷ്ട്ര സാന്നിധ്യം ശക്തമാക്കാൻ ഈ സഹകരണം സഹായിക്കുമെന്ന് ഷെയ്ഖ ബോദൂർ ബിന്ത് സുൽത്താൻ അൽ ഖാസിമി പറഞ്ഞു. റിട്രീറ്റുകളുടെ ആഗോളതലത്തിലുള്ള വളർച്ചയ്ക്കും മികച്ച അതിഥി സേവനം ഉറപ്പാക്കുന്നതിനും കരാർ നിർണായകമാണെന്ന് അഹമ്മദ് ഉബൈദ് അൽ ഖസീർ വ്യക്തമാക്കി. അനുഭവവേദ്യവും സുസ്ഥിരവുമായ ടൂറിസത്തെ പ്രോത്സാഹിപ്പിക്കുന്ന ഷുറൂഖിന്റെ കാഴ്ചപ്പാടിന് തങ്ങളുടെ അന്താരാഷ്ട്ര പരിചയസമ്പത്ത് കരുത്താകുമെന്ന് അമീർ ഗോൽബർഗും കൂട്ടിച്ചേർത്തു.
