മേയിൽ നടന്ന സംഭവത്തിന് പിന്നാലെ അടിയന്തര സുരക്ഷാ ക്രമീകരണങ്ങളും പ്രതികരണ ശേഷിയും വിജയകരമായി നടപ്പാക്കിയെന്ന് അന്താരാഷ്ട്ര ആണവോർജ ഏജൻസി വ്യക്തമാക്കി.
അബുദാബി — ഒക്ടോബർ 20, 2026 : അൽ ദഫ്രയിലെ ബറക ആണവോർജ നിലയത്തിന് സമീപമുണ്ടായ ഡ്രോൺ ആക്രമണത്തെത്തുടർന്ന് യുഎഇ സ്വീകരിച്ച അടിയന്തര സുരക്ഷാ നടപടികളും പ്രതിരോധ സംവിധാനങ്ങളും പൂർണമായും ഫലപ്രദമായിരുന്നുവെന്ന് അന്താരാഷ്ട്ര ആണവോർജ ഏജൻസി (ഐഎഇഎ) വ്യക്തമാക്കി.
യുഎഇ സർക്കാരിന്റെ പ്രത്യേക ക്ഷണപ്രകാരം ഒക്ടോബർ 12 മുതൽ 20 വരെ രാജ്യത്ത് സന്ദർശനം നടത്തിയ ആറംഗ അന്താരാഷ്ട്ര വിദഗ്ധ സംഘമാണ് സമഗ്ര പരിശോധന പൂർത്തിയാക്കി റിപ്പോർട്ട് പുറത്തുവിട്ടത്. നിലയത്തിന്റെ അടിയന്തര സുരക്ഷാ പ്രതികരണ സംവിധാനങ്ങളും മുൻകരുതലുകളും നേരിട്ട് വിലയിരുത്തിയ ശേഷമാണ് യുഎഇ സ്വീകരിച്ച ഇടപെടലുകൾ അന്താരാഷ്ട്ര മാനദണ്ഡങ്ങൾക്ക് അനുസൃതമാണെന്ന് ഏജൻസി സ്ഥിരീകരിച്ചത്.
2026 മേയ് 17-ന് ബറക ആണവനിലയത്തിന്റെ ഉൾപ്രദേശത്തിന് പുറത്തുള്ള ജനറേറ്ററിന് നേരെയാണ് ഡ്രോൺ ആക്രമണമുണ്ടായത്. തുടർന്ന് ബാഹ്യ വൈദ്യുതി വിതരണത്തിൽ തടസ്സം നേരിടുകയും തീപിടിത്തമുണ്ടാവുകയും ചെയ്തെങ്കിലും ഉടൻ തന്നെ സ്ഥിതി നിയന്ത്രണവിധേയമാക്കാൻ യുഎഇ സുരക്ഷാ വിഭാഗത്തിന് സാധിച്ചു. നിലയത്തിൻ്റെ പ്രധാന റിയാക്ടറുകൾക്ക് യാതൊരുവിധ നാശനഷ്ടവും സംഭവിച്ചിരുന്നില്ലെന്നും വികിരണ തോത് പൂർണമായും സുരക്ഷിത പരിധിയിലായിരുന്നുവെന്നും ഔദ്യോഗിക റിപ്പോർട്ടുകൾ വ്യക്തമാക്കി.
അടിയന്തര സാഹചര്യത്തിൽ കൃത്യമായ സുരക്ഷാ മാനദണ്ഡങ്ങൾ പാലിച്ചതിനൊപ്പം ദേശീയ-അന്തർദേശീയ തലങ്ങളിൽ സമയബന്ധിതമായി വിവരങ്ങൾ കൈമാറാനും പൊതുജനങ്ങളുമായി വിവരങ്ങൾ പങ്കുവെക്കാനും സാധിച്ചതായി ഐഎഇഎ സംഘം ചൂണ്ടിക്കാട്ടി. സംഘർഷ സാഹചര്യങ്ങളിൽ ആണവ നിലയങ്ങൾ ആക്രമിക്കപ്പെടരുതെന്ന അന്താരാഷ്ട്ര നിയമം മുൻനിർത്തി ജൂണിൽ യുഎഇ സന്ദർശിച്ച ഐഎഇഎ ഡയറക്ടർ ജനറൽ റഫേൽ മരിയാനോ ഗ്രോസി നടത്തിയ ചർച്ചകളുടെ തുടർച്ചയായാണ് ഇപ്പോഴത്തെ മിഷൻ എത്തിയത്.
ഫെഡറൽ അതോറിറ്റി ഫോർ ന്യൂക്ലിയർ റെഗുലേഷൻ (എഫ്എഎൻആർ), എമിറേറ്റ്സ് ന്യൂക്ലിയർ എനർജി കോർപ്പറേഷൻ (ഇഎൻഇസി) എന്നിവയുടെ പ്രതിനിധികളുമായി ഏജൻസി വിദഗ്ധർ ചർച്ച നടത്തി. ഐഎഇഎ മുന്നോട്ടുവെക്കുന്ന ‘ഏഴ് സുപ്രധാന സുരക്ഷാ തത്ത്വങ്ങൾ’ കൃത്യമായി നടപ്പാക്കിയതിൽ യുഎഇയുടെ നേതൃത്വത്തെ ദൗത്യസംഘം അഭിനന്ദിച്ചു. അടിസ്ഥാന സൗകര്യങ്ങളുടെ പ്രതിരോധശേഷി വർധിപ്പിക്കുന്നതിലും അടിയന്തര ഏകോപനത്തിലും രാജ്യം കാണിച്ച മാതൃക ആഗോള ആണവോർജ മേഖലയ്ക്ക് ഗുണകരമാണെന്ന് സംഘം വിലയിരുത്തി.
നാല് റിയാക്ടറുകൾ പ്രവർത്തിക്കുന്ന ബറക നിലയം യുഎഇയുടെ ആകെ വൈദ്യുതി ആവശ്യത്തിന്റെ കാൽഭാഗത്തോളമാണ് ഉൽപ്പാദിപ്പിക്കുന്നത്. 2021-ൽ 75 രാജ്യങ്ങൾ പങ്കെടുത്ത ‘കോൺവെക്‌സ്-3’ (ConvEx-3) അടിയന്തര മോക്ക് ഡ്രിൽ വിജയകരമായി സംഘടിപ്പിച്ചതുൾപ്പെടെയുള്ള വിപുലമായ സുരക്ഷാ അടിസ്ഥാനസൗകര്യങ്ങളാണ് രാജ്യത്ത് നിലവിലുള്ളത്. സംഭവത്തിന് ശേഷവും നാല് യൂണിറ്റുകളുടെയും പ്രവർത്തനം സാധാരണ നിലയിൽ തുടരുകയാണെന്ന് അധികൃതർ വ്യക്തമാക്കി.
