റമദാനിൽ 80 ലക്ഷം പേർക്ക് ഭക്ഷണം; മഹത്തായ പദ്ധതിയുമായി യു.എ.ഇ ഫുഡ് ബാങ്ക്

ദുബൈ: വിശുദ്ധ റമദാൻ മാസത്തിൽ യു.എ.ഇയിലും വിദേശത്തുമായി 80 ലക്ഷം പേർക്ക് ഭക്ഷണപ്പൊതികൾ വിതരണം ചെയ്യാനുള്ള പദ്ധതിയുമായി യു.എ.ഇ ഫുഡ്​ ബാങ്ക്​ രംഗത്ത്. അധികമായി ശേഷിക്കുന്ന ഭക്ഷണം ശേഖരിച്ച് അർഹരായവർക്കെത്തിക്കുന്നതാണു പദ്ധതിയുടെ ലക്ഷ്യം.

പദ്ധതി നടപ്പാക്കുന്നത് യു.എ.ഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂമിന്‍റെ പത്നിയും യു.എ.ഇ ഫുഡ് ബാങ്ക് ബോർഡ് ഓഫ് ട്രസ്റ്റീസ് ചെയർപേഴ്സണുമായ ശൈഖ ഹിന്ദ്​ ബിൻത്​ മക്​തൂം ബിൻ ജുമാ ആൽ മക്​തൂമിന്‍റെ നിർദേശപ്രകാരമാണ്.

‘ചാരിറ്റി ഫ്രിഡ്ജ്’, ‘മൈ ഹോം വിത്തൗട്ട് വേസ്റ്റ്’, ‘മീർ അൽ ഖൈർ’, ‘സഅബീൽ ഇഫ്താർ’, ‘റീസൈക്കിൾ, റീ ലൈഫ്’ എന്നീ അഞ്ച് പ്രധാന സംരംഭങ്ങളിലൂടെയാണ് പദ്ധതി നടപ്പാക്കുന്നത്. പൊതുമേഖലയും സ്വകാര്യമേഖലയും ചേർന്നാണ് അധിക ഭക്ഷണം ശേഖരിച്ച് ഗുണനിലവാര മാനദണ്ഡങ്ങൾ പാലിച്ച് വിതരണം ചെയ്യുന്നത്.

‘ചാരിറ്റി ഫ്രിഡ്ജ്’ പദ്ധതിയിലൂടെ ദുബൈയിലെ താമസ മേഖലകളിൽ പ്രത്യേക ഫ്രിഡ്ജുകൾ സ്ഥാപിച്ച് ഇഫ്താർ, അത്താഴ സമയങ്ങളിൽ ശേഷിക്കുന്ന ഭക്ഷണം സുരക്ഷിതമായി സംഭാവന ചെയ്യാൻ സൗകര്യമൊരുക്കും. ‘മൈ ഹോം വിത്തൗട്ട് വേസ്റ്റ്’ വഴി വീട്ടമ്മമാർക്കും ജോലി ചെയ്യുന്ന സ്ത്രീകൾക്കും ഭക്ഷണം സംരക്ഷിക്കുന്നതും പാഴാക്കൽ കുറയ്ക്കുന്നതുമായി ബന്ധപ്പെട്ട ബോധവത്കരണ പ്രവർത്തനങ്ങൾ സംഘടിപ്പിക്കും.

‘മീർ അൽ ഖൈർ’ പദ്ധതിയിലൂടെ ആവശ്യക്കാരായ കുടുംബങ്ങൾക്ക് ഭക്ഷണ കിറ്റുകൾ വിതരണം ചെയ്യും. ‘സഅബീൽ ഇഫ്താർ’ സംരംഭത്തിന്റെ ഭാഗമായി സഅബീൽ പാർക്കിൽ തൊഴിലാളികൾക്കായി കൂട്ട ഇഫ്താർ സംഘടിപ്പിക്കും.

ഇതോടൊപ്പം, ഭക്ഷ്യനഷ്ടം കുറയ്ക്കുന്നതിനുള്ള ദേശീയ പദ്ധതിയായ Ne’maയുമായി സഹകരിച്ച് ‘റീസൈക്കിൾ, റീ ലൈഫ്’ സംരംഭവും നടപ്പാക്കും. ഹോട്ടലുകളിൽ നിന്നുള്ള ശേഷിച്ച ഭക്ഷണം പുനർവിതരണം ചെയ്യുകയും ഉപയോഗിക്കാൻ കഴിയാത്ത അവശിഷ്ടങ്ങൾ ജൈവവളമായി മാറ്റുകയും ചെയ്യും.

ഭക്ഷ്യസുരക്ഷ ശക്തിപ്പെടുത്തുക, ഭക്ഷ്യനഷ്ടം കുറയ്ക്കുക, കാർബൺ പുറന്തള്ളൽ കുറയ്ക്കുക, പരിസ്ഥിതി സൗഹൃദ സർക്കുലർ ഇക്കോണമി പ്രോത്സാഹിപ്പിക്കുക എന്നിവയാണ് ക്യാമ്പയിന്റെ പ്രധാന ലക്ഷ്യങ്ങൾ. സമൂഹപങ്കാളിത്തവും സ്വയംസേവനവും ശക്തിപ്പെടുത്തി ലോകമെമ്പാടുമുള്ള അർഹരായ സമൂഹങ്ങൾക്ക് ദീർഘകാല പിന്തുണ നൽകുകയെന്നതാണ് യു.എ.ഇ ഫുഡ് ബാങ്കിന്റെ ദൗത്യം.