അപരിചിതമായ ഡെലിവറികളും വ്യാജ സമ്മാനങ്ങളും വഴി കുട്ടികളെ ലക്ഷ്യമിടുന്ന സംഘങ്ങൾക്കെതിരെ നാഷണൽ ആന്റി-നാർക്കോട്ടിക്സ് അതോറിറ്റിയുടെ മുന്നറിയിപ്പ്.
അബുദാബി, ഓഗസ്റ്റ് 10, 2026:കുട്ടികളെയും കൗമാരക്കാരെയും ലക്ഷ്യമിട്ട് എ4 പേപ്പറുകളിലും മിഠായികളിലും അപരിചിതമായ കൊറിയർ സേവനങ്ങളിലും മയക്കുമരുന്ന് ഒളിപ്പിച്ചുകടത്തുന്ന രീതികൾക്കെതിരെ യുഎഇ നാഷണൽ ആന്റി-നാർക്കോട്ടിക്സ് അതോറിറ്റി അതീവ ജാഗ്രതാ നിർദേശം നൽകി.
സുരക്ഷാ ഏജൻസികൾ അടുത്തിടെ നടത്തിയ പരിശോധനകളിലാണ് ലഹരി മാഫിയ ഉപയോഗിക്കുന്ന പുതിയ കടത്തുരീതികൾ കണ്ടെത്തിയത്. സാധാരണക്കാരുടെ ശ്രദ്ധയിൽ പെടാത്ത രീതിയിൽ ലഹരിവസ്തുക്കൾ വിതരണം ചെയ്യാനാണ് ഈ തന്ത്രങ്ങൾ ഉപയോഗിക്കുന്നത്.
ദ്രാവക രൂപത്തിലുള്ള ലഹരിവസ്തുക്കൾ സാധാരണ എ4 പേപ്പറുകളിൽ കലർത്തി ഉണക്കിയെടുക്കുന്നതാണ് ഒരു രീതി. ഒറ്റനോട്ടത്തിൽ സാധാരണ കടലാസുകളായി തോന്നിക്കുന്ന ഇവ കണ്ടുപിടിക്കുക പ്രയാസകരമാണ്. വിപണിയിൽ ലഭിക്കുന്ന മിഠായികൾക്കുള്ളിൽ ലഹരി സാന്നിധ്യം ചേർത്തും, അപരിചിതമായ നമ്പറുകളിൽ നിന്നുള്ള സന്ദേശങ്ങളുടെ അടിസ്ഥാനത്തിൽ ഓർഡർ ചെയ്യാത്ത പാഴ്സലുകളും സമ്മാനങ്ങളും ഡെലിവറി ഏജൻസികൾ വഴി വീട്ടിലെത്തിച്ചുമാണ് മറ്റ് തന്ത്രങ്ങൾ നടപ്പാക്കുന്നത്.
സംസ്ഥാനത്തിന്റെ അതിർത്തികളിലും തുറമുഖങ്ങളിലും കസ്റ്റംസ് പരിശോധനകൾ ശക്തമാക്കിയതായി ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്പ്, കസ്റ്റംസ് ആൻഡ് പോർട്ട് സെക്യൂരിറ്റി (ഐസിപി) ഡയറക്ടർ ജനറൽ മേജർ ജനറൽ സുഹൈൽ സഈദ് അൽ ഖൈലി വ്യക്തമാക്കി.
കുട്ടികളുടെ പെരുമാറ്റത്തിൽ പെട്ടെന്നുണ്ടാകുന്ന മാറ്റങ്ങൾ രക്ഷിതാക്കൾ ശ്രദ്ധിക്കണമെന്ന് ആന്റി-നാർക്കോട്ടിക്സ് അതോറിറ്റി ആവശ്യപ്പെട്ടു. അപരിചിതമായ പാഴ്സലുകളോ സമ്മാനങ്ങളോ സ്വീകരിക്കരുത്. കുട്ടികളുമായി തുറന്ന സംഭാഷണം നിലനിർത്തുന്നത് ലഹരിവലയിൽ വീഴുന്നത് തടയാൻ സഹായിക്കും.
ലഹരി ഉപയോഗവുമായി ബന്ധപ്പെട്ട് സഹായം ആവശ്യമുള്ളവർക്ക് ‘ഹിസ്ൻ’ (Hisn) ഹെൽപ്പ് ലൈൻ സേവനമായ 80044 എന്ന നമ്പറിൽ ബന്ധപ്പെടാം. ലഹരി അടിമത്തം ഒരു രോഗമാണെന്നും കൃത്യമായ ചികിത്സയിലൂടെ പരിഹരിക്കാൻ കഴിയുമെന്നും അധികൃതർ ഓർമിപ്പിച്ചു.
