അബുദാബി: യുഎഇയിൽ ശക്തമായ കാറ്റിനും പൊടിക്കാറ്റിനും സാധ്യതയുണ്ടെന്ന് നാഷണൽ സെൻറർ ഓഫ് മെറ്റീരിയോളജി (NCM) മുന്നറിയിപ്പ് നൽകി. മണിക്കൂറിൽ 40 കിലോമീറ്റർ വരെ വേഗതയിൽ കാറ്റ് വീശാൻ സാധ്യതയുള്ളതിനാൽ വിവിധ ഭാഗങ്ങളിൽ പൊടിയും മണലും ഉയരാനിടയുണ്ടെന്നാണ് അറിയിപ്പ്. അറേബ്യൻ ഗൾഫിലും ഒമാൻ കടലിലും കടൽ പ്രക്ഷുബ്ധമാകുമെന്നും അധികൃതർ അറിയിച്ചു.
ഇന്ന് രാജ്യത്ത് പൊതുവേ തെളിഞ്ഞ കാലാവസ്ഥയാകും അനുഭവപ്പെടുക. എന്നാൽ ചില ഭാഗങ്ങളിൽ മങ്ങിയ അന്തരീക്ഷവും പൊടിപടലങ്ങളും അനുഭവപ്പെടാൻ സാധ്യതയുണ്ട്. കഴിഞ്ഞ ദിവസങ്ങളെ അപേക്ഷിച്ച് താപനിലയിൽ നേരിയ കുറവും പ്രതീക്ഷിക്കുന്നതായി എൻസിഎം വ്യക്തമാക്കി.
കിഴക്കൻ മേഖലയിൽ നിന്നുള്ള ദുർബല ന്യൂനമർദ സ്വാധീനവും പടിഞ്ഞാറൻ ഭാഗത്തുള്ള ഉയർന്ന മർദ സംവിധാനവുമാണ് നിലവിലെ കാലാവസ്ഥയ്ക്ക് കാരണമാകുന്നതെന്ന് റിപ്പോർട്ടിൽ പറയുന്നു. മുകളിലെ അന്തരീക്ഷത്തിലും ഉയർന്ന മർദ പാളി നിലനിൽക്കുന്നുണ്ട്.
വടക്ക്-പടിഞ്ഞാറ് മുതൽ തെക്ക്-പടിഞ്ഞാറ് ദിശകളിലേക്ക് വീശുന്ന കാറ്റ് ചില സമയങ്ങളിൽ ശക്തിപ്രാപിക്കും. ഇതോടെ മരുഭൂമി മേഖലകളിലും തുറസ്സായ പ്രദേശങ്ങളിലും ദൂരക്കാഴ്ച കുറയാൻ സാധ്യതയുണ്ട്. വാഹനമോടിക്കുന്നവർ ജാഗ്രത പാലിക്കണമെന്ന് അധികൃതർ നിർദേശിച്ചു.
തീരദേശ-ദ്വീപ് മേഖലകളിൽ താപനില 34 മുതൽ 40 ഡിഗ്രി സെൽഷ്യസ് വരെയായിരിക്കും. ഉൾനാടൻ പ്രദേശങ്ങളിൽ 38 മുതൽ 42 ഡിഗ്രി വരെ ഉയരാനിടയുണ്ട്. പർവത മേഖലകളിൽ 27 മുതൽ 32 ഡിഗ്രി സെൽഷ്യസ് വരെയാണ് പ്രതീക്ഷിക്കുന്ന താപനില.
അറേബ്യൻ ഗൾഫിലും ഒമാൻ കടലിലും കടൽ അവസ്ഥ മിതമായതിൽ നിന്ന് പ്രക്ഷുബ്ധമായതിലേക്കാകുമെന്നും മത്സ്യത്തൊഴിലാളികളും ചെറുകപ്പൽ യാത്രക്കാരും ജാഗ്രത പാലിക്കണമെന്നും മുന്നറിയിപ്പുണ്ട്.
വാരാന്ത്യത്തിലും സമാനമായ പൊടിക്കാറ്റ് സാഹചര്യങ്ങൾ തുടരുമെന്നാണ് കാലാവസ്ഥ നിരീക്ഷണ കേന്ദ്രത്തിന്റെ പ്രവചനം. ശനിയാഴ്ച വീണ്ടും താപനിലയിൽ ചെറിയ കുറവ് ഉണ്ടാകാനിടയുണ്ട്. അടുത്ത ആഴ്ച തുടക്കത്തിൽ തീരദേശ, ഉൾനാടൻ മേഖലകളിൽ ഈർപ്പം കൂടുകയും മൂടൽമഞ്ഞിന് സാധ്യതയുണ്ടാകുകയും ചെയ്യുമെന്നും എൻസിഎം അറിയിച്ചു.
