മന്ത്രി എം. ലിജുവിന് ആശംസകൾ നേർന്നു; സാമ്പത്തികമായി പിന്നാക്കം നിൽക്കുന്ന നഴ്സിംഗ് വിദ്യാർത്ഥികൾക്കുള്ള ധനസഹായ വിതരണം ഓഗസ്റ്റ് 22-ന്.
അജ്മാൻ : വേൾഡ് മലയാളി കൗൺസിൽ (ഡബ്ല്യു.എം.സി) മിഡിൽ ഈസ്റ്റ് റീജിയൻ അജ്മാൻ പ്രൊവിൻസിന്റെ ആഭിമുഖ്യത്തിൽ അനുമോദന സംഗമവും ചാരിറ്റി സഹായ വിതരണവും സംഘടിപ്പിച്ചു. ചടങ്ങിൽ സഹകരണ, എക്സൈസ് വകുപ്പ് മന്ത്രി എം. ലിജുവിന് പ്രൊവിൻസിന്റെ ആശംസകൾ കൈമാറി.
അജ്മാൻ പ്രൊവിൻസ് പ്രസിഡന്റ് ജോഫി ഫിലിപ്പാണ് മന്ത്രി എം. ലിജുവിന് സംഘടനയുടെ ആശംസകളും സഹകരണവും അറിയിച്ചത്. സാമൂഹിക പ്രതിബദ്ധതാ പ്രവർത്തനങ്ങളുടെ ഭാഗമായി പ്രൊവിൻസ് ശേഖരിച്ച വിവിധ ചികിത്സാ സഹായങ്ങളുടെ വിതരണവും ചടങ്ങിൽ നടന്നു.
റംസാൻ മാസത്തിൽ സമാഹരിച്ച വൈദ്യസഹായ ഫണ്ട്, നട്ടെല്ലിന് ഗുരുതരമായി പരിക്കേറ്റ് ചികിത്സയിൽ കഴിയുന്ന വ്യക്തിയുടെ കുടുംബത്തിന് ഭാരവാഹികൾ കൈമാറി.
സാമ്പത്തികമായി പിന്നാക്കം നിൽക്കുന്ന 100 നഴ്സിംഗ് വിദ്യാർത്ഥികൾക്ക് 1 ലക്ഷം രൂപ വീതം നൽകുന്ന പദ്ധതിയുടെ രണ്ടാംഘട്ട ധനസഹായ വിതരണം 2026 ഓഗസ്റ്റ് 22-ന് എറണാകുളം റാഡിസൺ ബ്ലൂ ഹോട്ടലിൽ വെച്ച് നടക്കുമെന്നും സംഘടന ഭാരവാഹികൾ അറിയിച്ചു.
ഡബ്ല്യു.എം.സി ഗ്ലോബൽ ചെയർമാൻ തോമസ് മൊട്ടക്കൽ, മിഡിൽ ഈസ്റ്റ് ചെയർമാൻ സക്കീർ ഹുസൈൻ, മിഡിൽ ഈസ്റ്റ് വുമൺസ് ഫോറം പ്രസിഡന്റ് നസീലാ ഹുസൈൻ എന്നിവരും അജ്മാൻ പ്രൊവിൻസ് ഭാരവാഹികളായ ചെയർമാൻ ശശിധരൻ, സെക്രട്ടറി ഈനാസ് അനസ്, ട്രഷറർ ശൈലജ ശശി, ബിന്ദു ബാബു എന്നിവർ ആശംസകൾ അറിയിച്ചു
ചടങ്ങിൽ നഗരസഭ കൗൺസിലർ അൻസാരി കോയിക്കലേത്, അഷറഫ് നിലക്കൽ, ഡോ. ഗീവർഗീസ് ജോഫി ഫിലിപ്പ് എന്നിവരും പങ്കെടുത്തു.
