സഫാരി പാർക്കിന്റെ അഞ്ചാം സീസൺ ആരംഭത്തോടനുബന്ധിച്ച് വിവിധ വിഭാഗങ്ങളിലായി മത്സരം സംഘടിപ്പിക്കുന്നത് ഷാർജ സ്പോർട്സ് കൗൺസിൽ
ഷാർജ, സെപ്റ്റംബർ 26, 2026 : ഷാർജ സഫാരി പാർക്കിന്റെ അഞ്ചാം സീസൺ തുടക്കത്തിന് ആവേശം പകർന്ന് നാലാമത് ഷാർജ സഫാരി റൺ ഒക്ടോബർ 4 ഞായറാഴ്ച നടക്കും. ഷാർജ സ്പോർട്സ് കൗൺസിലാണ് പ്രാദേശിക പങ്കാളികളുമായി സഹകരിച്ച് മത്സരം സംഘടിപ്പിക്കുന്നത്.
വിവിധ പ്രായക്കാർക്കും കായികക്ഷമതയുള്ളവർക്കുമായി 10 കിലോമീറ്റർ, 5 കിലോമീറ്റർ, 3 കിലോമീറ്റർ, 1 കിലോമീറ്റർ എന്നിങ്ങനെ നാല് വിഭാഗങ്ങളിലാണ് മത്സരങ്ങൾ ക്രമീകരിച്ചിരിക്കുന്നത്. പരമാവധി 600 പേർക്കാണ് ഇത്തവണ പങ്കെടുക്കാൻ അവസരം നൽകുന്നത്.
രാവിലെ 6:15 മുതൽ ഘട്ടങ്ങളായി മത്സരങ്ങൾ ആരംഭിക്കും. ഒമ്പത് മണിയോടെ ഇവ അവസാനിക്കും. പ്രകൃതിദത്തമായ വന്യജീവി ആവാസവ്യവസ്ഥയ്ക്ക് നടുവിലൂടെയുള്ള ട്രാക്കിലൂടെയാണ് ഓട്ടം നടക്കുക. അൽ ദൈദിൽ സ്ഥിതി ചെയ്യുന്ന ഷാർജ സഫാരി പാർക്കിൽ 120-ലധികം ഇനങ്ങളിലായി അമ്പതിനായിരത്തിലേറെ ആഫ്രിക്കൻ മൃഗങ്ങളും പക്ഷികളുമുണ്ട്.
മത്സരം പൂർത്തിയാക്കുന്ന എല്ലാ പങ്കാളികൾക്കും മെഡലുകൾ നൽകും. ഓരോ വിഭാഗത്തിലും ആദ്യ മൂന്ന് സ്ഥാനങ്ങളിലെത്തുന്ന വിജയികൾക്ക് പ്രത്യേക പുരസ്കാരങ്ങളും സമ്മാനിക്കും.
ശൈത്യകാലത്തിന്റെ വരവോടെ സന്ദർശകർക്കായി വാതിലുകൾ തുറക്കുന്ന സഫാരി പാർക്കിലേക്ക് വിനോദസഞ്ചാരികളെയും കായികപ്രേമികളെയും ഒരേപോലെ ആകർഷിക്കുകയാണ് കായിക കൗൺസിലിന്റെ ലക്ഷ്യം. പ്രൊഫഷണൽ അത്ലറ്റുകൾക്ക് പുറമെ കുടുംബങ്ങൾക്കും കുട്ടികൾക്കും പങ്കെടുക്കാവുന്ന തരത്തിലാണ് ചുരുങ്ങിയ ദൂരത്തിലുള്ള ട്രാക്കുകൾ തയ്യാറാക്കിയിരിക്കുന്നത്.
