മിഡിൽ ഈസ്റ്റിലെ കോർപ്പറേറ്റ് മേഖല അഭിമുഖീകരിക്കുന്ന പ്രതിഭകളുടെ ദൗർലഭ്യം മറികടക്കാൻ അന്താരാഷ്ട്ര തലത്തിൽ സാക്ഷ്യപ്പെടുത്തിയ ലീഡർഷിപ്പ് കോഴ്സുകൾ വരുന്നു.
ദുബായ്: മിഡിൽ ഈസ്റ്റിലെ, പ്രത്യേകിച്ച് യുഎഇ ഉൾപ്പെടെയുള്ള ജിസിസി രാജ്യങ്ങളിലെ കോർപ്പറേറ്റ് മേഖല നേരിടുന്ന കടുത്ത മനുഷ്യവിഭവ ശേഷിക്കുറവ് പരിഹരിക്കുകയെന്ന ലക്ഷ്യത്തോടെ പരിശീലന-കൺസൾട്ടിംഗ് രംഗത്തെ ആഗോള പ്രമുഖരായ ബ്ലൂ ഓഷ്യൻ കോർപ്പറേഷൻ യുകെയിലെ ഏറ്റവും പഴക്കമേറിയ സർവകലാശാലകളിലൊന്നായ യൂണിവേഴ്സിറ്റി ഓഫ് വെയിൽസ് ട്രിനിറ്റി സെന്റ് ഡേവിഡ് (UWTSD)-യുമായി തന്ത്രപ്രധാനമായ കരാറിലേർപ്പെട്ടു.
യുഎഇയിലും മറ്റ് ജിസിസി രാജ്യങ്ങളിലും പ്രഖ്യാപിക്കപ്പെട്ട മെഗാ പ്രൊജക്ടുകളും അതിവേഗത്തിലുള്ള സാമ്പത്തിക വളർച്ചയും ഉദ്യോഗാർത്ഥികളിൽ കാലോചിതമായ നൈപുണ്യ വികസനത്തിന്റെ ആവശ്യകത വർധിപ്പിച്ചിരിക്കുകയാണ്. ജിസിസി രാജ്യങ്ങളിലുടനീളം വിവിധ മേഖലകളിൽ 50 മുതൽ 75 ശതമാനം വരെ നൈപുണ്യക്കുറവ് നിലനിൽക്കുന്നുണ്ടെന്നാണ് വിവിധ പഠനങ്ങൾ വ്യക്തമാക്കുന്നത്. ആവശ്യത്തിന് യോഗ്യതയും നേതൃപാടവവുമുള്ള ഉദ്യോഗാർത്ഥികളെ കണ്ടെത്താനാകാതെ കോർപ്പറേറ്റ് നിയമനങ്ങൾ കടുത്ത പ്രതിസന്ധി നേരിടുന്ന പശ്ചാത്തലത്തിലാണ് ഈ പുതിയ പങ്കാളിത്തം.
ഈ കരാറിന്റെ ഭാഗമായി, ബ്ലൂ ഓഷ്യൻ കോർപ്പറേഷൻ രൂപകൽപ്പന ചെയ്യുന്ന തിരഞ്ഞെടുത്ത പ്രൊഫഷണൽ, എക്സിക്യൂട്ടീവ് വിദ്യാഭ്യാസ പരിപാടികൾക്ക് UWTSD അന്താരാഷ്ട്ര അംഗീകാരവും സർട്ടിഫിക്കേഷനും നൽകും. ലീഡർഷിപ്പ്, മാനേജ്മെന്റ്, സി-സ്യൂട്ട് (CXO) ഡെവലപ്മെന്റ്, ഹ്യൂമൻ റിസോഴ്സ്, സപ്ലൈ ചെയിൻ, പ്രൊക്യൂർമെന്റ്, വ്യോമയാന മേഖല, ഇൻഫ്രാസ്ട്രക്ചർ, ഡിജിറ്റൽ പരിവർത്തനം, കൃത്രിമ ബുദ്ധി (AI), സുസ്ഥിരത തുടങ്ങിയ ഉയർന്ന തൊഴിൽസാധ്യതയുള്ള മേഖലകളിലായിരിക്കും കോഴ്സുകൾ കേന്ദ്രീകരിക്കുക.
“ലോകം ഇന്ന് സാമ്പത്തിക, സാങ്കേതിക, സാമൂഹിക മേഖലകളിൽ ആഴത്തിലുള്ള മാറ്റങ്ങളിലൂടെയാണ് കടന്നുപോകുന്നത്. തന്ത്രപരമായി ചിന്തിക്കാനും സങ്കീർണ്ണ സാഹചര്യങ്ങളെ ഫലപ്രദമായി കൈകാര്യം ചെയ്യാനും കഴിയുന്ന ലീഡർമാരെയാണ് ഇന്ന് കോർപ്പറേറ്റ് ലോകത്തിന് ആവശ്യം,” എന്ന് യൂണിവേഴ്സിറ്റി ഓഫ് വെയിൽസ് ട്രിനിറ്റി സെന്റ് ഡേവിഡിന്റെ മാനേജ്മെന്റ് ആൻഡ് ഹെൽത്ത് വിഭാഗം ഡീൻ പ്രൊഫസർ ഗാരത്ത് ഡേവിസ് വ്യക്തമാക്കി.
അക്കാദമിക മികവും പ്രായോഗിക ബിസിനസ്സ് രീതികളും സമന്വയിപ്പിച്ച് ഭാവിയിലെ മികച്ച നേതാക്കളെ വാർത്തെടുക്കാൻ ഈ പങ്കാളിത്തം സഹായിക്കുമെന്നും അദ്ദേഹം കൂട്ടിച്ചേർത്തു.
ഇന്ന് കമ്പനികൾ നേരിടുന്ന ഏറ്റവും വലിയ വെല്ലുവിളി സാങ്കേതികവിദ്യയല്ല, മറിച്ച് ശരിയായ നേതൃത്വത്തിന്റെ അഭാവമാണെന്ന് ബ്ലൂ ഓഷ്യൻ കോർപ്പറേഷൻ ചെയർമാനും മാനേജിംഗ് ഡയറക്ടറുമായ ഡോ. സത്യ മേനോൻ പറഞ്ഞു. “കൃത്രിമ ബുദ്ധി, ഡിജിറ്റൽ പരിവർത്തനം, തൊഴിൽ രംഗത്തെ മാറുന്ന പ്രതീക്ഷകൾ എന്നിവ വ്യവസായങ്ങളെയാകെ പുനർരൂപകൽപ്പന ചെയ്യുകയാണ്. ഈ സങ്കീർണ്ണതകളെ അതിജീവിച്ച് ദീർഘകാല സ്വാധീനം ചെലുത്താൻ കെൽപ്പുള്ള നേതാക്കളെ വളർത്തിയെടുക്കുകയാണ് ഞങ്ങളുടെ ലക്ഷ്യം,” അദ്ദേഹം വ്യക്തമാക്കി.
1822-ൽ സ്ഥാപിതമായ UWTSD, യുകെയിൽ ഏറ്റവും പ്രശസ്തമായ അക്കാദമിക പാരമ്പര്യമുള്ള ഉന്നതവിദ്യാഭ്യാസ സ്ഥാപനങ്ങളിലൊന്നാണ്. പ്രൊഫഷണൽ വിദ്യാഭ്യാസം, എക്സിക്യൂട്ടീവ് ഡെവലപ്മെന്റ് എന്നീ മേഖലകളിൽ മൂന്ന് പതിറ്റാണ്ടുകളുടെ അനുഭവസമ്പത്തുള്ള ബ്ലൂ ഓഷ്യൻ കോർപ്പറേഷനുമായി സർവകലാശാല കൈകോർക്കുമ്പോൾ മിഡിൽ ഈസ്റ്റിലെ പ്രൊഫഷണലുകൾക്ക് അത് വലിയ അവസരങ്ങളാണ് തുറന്നുനൽകുന്നത്.
