ദുബൈ: നിലവിലെ പ്രതിസന്ധി സാഹചര്യത്തിൽ ജിസിസി മേഖലയിലെ വിദേശികളായ താമസക്കാരുടെ സുരക്ഷയും സ്ഥിരതയും ബിസിനസ്സ് തുടർച്ചയും ഉറപ്പുനൽകുന്ന ഭരണ നേതൃത്വത്തെ ആത്മാർത്ഥമായി അഭിനന്ദിക്കുന്നതായി ആസ്‌റ്റർ ഡിഎം ഹെൽത്ത് കെയറിന്റെ സ്ഥാപക ചെയർമാൻ ഡോ. ആസാദ് മൂപ്പൻ അറിയിച്ചു.
പ്രവാസി സമൂഹത്തെ ചേർത്തുപിടിച്ച് അചഞ്ചലമായ പ്രതിബദ്ധതയോടെ പ്രവർത്തിക്കുന്ന ജിസിസി രാജ്യങ്ങളിലെ ഭരണകൂടങ്ങളുടെ അവസരോചിതവും സജീവവുമായ നടപടികൾ ഏറെ പ്രശംസനീയമാണെന്ന് അദ്ദേഹം പറഞ്ഞു. ദീർഘവീക്ഷണവും പ്രതിരോധശേഷിയും പ്രകടിപ്പിച്ചുകൊണ്ട് സമൂഹങ്ങളുടെ ക്ഷേമവും സുരക്ഷയും ആത്മവിശ്വാസവും മുൻഗണന നൽകുന്ന ഭരണ നേതൃത്വം മാതൃകാപരമാണെന്നും അദ്ദേഹം കൂട്ടിച്ചേർത്തു.
നോർക്ക റൂട്ട്സ് മുഖേന ഗൾഫ് രാജ്യങ്ങളിൽ നിന്നുള്ള ലോക കേരള സഭാ പ്രതിനിധികളുടെ ഓൺലൈൻ യോഗത്തിൽ സംസാരിക്കുകയായിരുന്നു അദ്ദേഹം. ഈ പ്രതിസന്ധി സാഹചര്യത്തിൽ പ്രവാസി സമൂഹത്തിന്റെ സുരക്ഷയ്ക്കായി കേരള സർക്കാർ സ്വീകരിച്ച ഏകോപന നടപടികളെക്കുറിച്ച് വിശദീകരിച്ച മുഖ്യമന്ത്രി പിണറായി വിജയന്റെ സജീവ ഇടപെടലിനെയും ഡോ. മൂപ്പൻ അഭിനന്ദിച്ചു.
ജിസിസിയിലെയും കേരളത്തിലെയും ഉത്തരവാദിത്തമുള്ള ഭരണ നേതൃത്വം ദശലക്ഷക്കണക്കിന് പ്രവാസികൾക്ക് വലിയ ആത്മവിശ്വാസവും ആശ്വാസവും നൽകുന്നുവെന്ന് അദ്ദേഹം അഭിപ്രായപ്പെട്ടു. രണ്ട് പ്രദേശങ്ങളുടെയും വളർച്ചയ്ക്കും സമൃദ്ധിക്കും പ്രവാസി സമൂഹം നൽകിയ സംഭാവന അനിവാര്യമായതാണെന്നും, ഇത്തരം വെല്ലുവിളികൾ നേരിടുന്ന ഘട്ടങ്ങളിൽ ഏകോപിതമായ നേതൃത്വമാണ് ഏറ്റവും വലിയ ശക്തിയെന്നും ഡോ. ആസാദ് മൂപ്പൻ വ്യക്തമാക്കി.
English Summary
Dr. Azad Moopen, Founder Chairman of Aster DM Healthcare, has praised the leadership of GCC countries for ensuring the safety, stability, and business continuity of expatriates during the ongoing crisis. Speaking at an online meeting of Loka Kerala Sabha representatives organized through NORKA Roots, he commended the proactive and coordinated measures taken by GCC authorities. Dr. Moopen also appreciated Kerala Chief Minister Pinarayi Vijayan for his active intervention and support for the expatriate community. He stated that responsible leadership in both the GCC and Kerala has instilled confidence and reassurance among millions of expatriates contributing to the growth of both regions.
