പാസ്‌പോർട്ട് സ്കാൻ ചെയ്ത് ക്യൂ ഒഴിവാക്കാം; ‘സ്മാർട്ട് ഗേറ്റ് പ്രീ-ചെക്ക്’ സംവിധാനവുമായി ജി.ഡി.ആർ.എഫ്.എയും ദുബായ് എയർപോർട്ടും
ദുബായ്, യു.എ.ഇ : ദുബായ് അന്താരാഷ്ട്ര വിമാനത്താവളം (DXB) വഴി യാത്ര ചെയ്യുന്നവർക്ക് ഇമിഗ്രേഷൻ കൗണ്ടറുകളിലെ നീണ്ട ക്യൂ ഒഴിവാക്കി നിമിഷങ്ങൾക്കകം പുറത്തുകടക്കാനുള്ള ‘സ്മാർട്ട് ഗേറ്റ്’ (Smart Gates) സൗകര്യം തങ്ങൾക്ക് ലഭ്യമാണോ എന്ന് ഇനി യാത്രയ്ക്ക് മുൻപായി തന്നെ ഓൺ‌ലൈനിൽ പരിശോധിക്കാം. ഇതിനായി ‘സ്മാർട്ട് ഗേറ്റ്സ് പ്രീ-ചെക്ക്’ (Smart Gates PreCheck) എന്ന പുതിയ ഡിജിറ്റൽ സംവിധാനം ദുബായ് എയർപോർട്ട് അവതരിപ്പിച്ചു.
ആർട്ടിഫിഷ്യൽ ഇന്റലിജൻസും ഫേഷ്യൽ റെക്കഗ്നിഷൻ (മുഖം തിരിച്ചറിയൽ) സാങ്കേതികവിദ്യയും ഉപയോഗിച്ച് പ്രവർത്തിക്കുന്ന സ്മാർട്ട് ഗേറ്റുകൾ വഴി വെറും 7 മുതൽ 13 സെക്കൻഡിനുള്ളിൽ ഇമിഗ്രേഷൻ നടപടികൾ പൂർത്തിയാക്കാൻ സാധിക്കും. എന്നാൽ പല പ്രവാസി മലയാളികളും സന്ദർശകരും തങ്ങൾക്ക് ഈ സൗകര്യം ഉപയോഗിക്കാൻ യോഗ്യതയുണ്ടെന്ന കാര്യം അറിയാതെ ഇപ്പോഴും സാധാരണ പാസ്‌പോർട്ട് കൗണ്ടറുകളിൽ ക്യൂ നിൽക്കാറുണ്ട്. ഇത് ഒഴിവാക്കാനാണ് പുതിയ ഓൺ‌ലൈൻ സ്കാനിങ് സംവിധാനം.
യോഗ്യത എങ്ങനെ ഓൺ‌ലൈനിൽ പരിശോധിക്കാം?
ലോകത്തിന്റെ ഏത് കോണിൽ നിന്നും നിങ്ങളുടെ സ്മാർട്ട്‌ഫോൺ ഉപയോഗിച്ച് ഒരു മിനിറ്റിൽ താഴെ സമയം കൊണ്ട് യോഗ്യത പരിശോധിക്കാവുന്നതാണ്:
- ഫോണിലെ ബ്രൗസർ വഴി
dxb.pocketflights.comഎന്ന വെബ്‌സൈറ്റ് സന്ദർശിക്കുക. - അതിലെ Smart Gates PreCheck എന്ന ഓപ്ഷൻ തിരഞ്ഞെടുക്കുക.
- നിങ്ങളുടെ ഒറിജിനൽ പാസ്‌പോർട്ടിന്റെ ഫോട്ടോയുള്ള പ്രധാന പേജ് ക്യാമറയ്ക്ക് മുന്നിൽ വ്യക്തമായി കാണിക്കുക.
- സിസ്റ്റം പാസ്‌പോർട്ട് സ്കാൻ ചെയ്ത ഉടൻ തന്നെ നിങ്ങൾക്ക് സ്മാർട്ട് ഗേറ്റ് ഉപയോഗിക്കാനാകുമോ എന്ന് സ്ക്രീനിൽ തെളിയും.
ശ്രദ്ധിക്കുക: വിമാനത്താവളത്തിൽ എത്തിയവർക്ക് കൗണ്ടറുകൾക്ക് സമീപം പതിച്ചിട്ടുള്ള QR കോഡുകൾ സ്കാൻ ചെയ്തും ഈ സേവനം തത്സമയം ഉപയോഗിക്കാം.
ഇതുകൂടാതെ, ദുബായ് ജി.ഡി.ആർ.എഫ്.എ (GDRFA) ഔദ്യോഗിക വെബ്‌സൈറ്റിലെ ‘Inquiry for Smart Gate Registration’ വഴി പാസ്‌പോർട്ട് നമ്പറോ എമിറേറ്റ്സ് ഐഡിയോ നൽകിയും രജിസ്ട്രേഷൻ വിവരങ്ങൾ പരിശോധിക്കാവുന്നതാണ്. എന്നാൽ പാസ്‌പോർട്ട് നേരിട്ട് സ്കാൻ ചെയ്യുന്ന പ്രീ-ചെക്ക് സംവിധാനമാണ് കൂടുതൽ വേഗത്തിലുള്ളത്.
സ്മാർട്ട് ഗേറ്റ് എങ്ങനെ ഉപയോഗിക്കാം?
യോജ്യതയുള്ള യാത്രക്കാർ വിമാനത്താവളത്തിലെ സ്മാർട്ട് ഗേറ്റുകൾ ഉപയോഗിക്കേണ്ട രീതി താഴെ പറയുന്നതാണ്:
- സ്റ്റെപ്പ് 1: ഗേറ്റിന് മുന്നിലെ അടയാളപ്പെടുത്തിയ പാദമുദ്രകളിൽ നിവർന്നു നിൽക്കുക.
- സ്റ്റെപ്പ് 2: മാസ്ക്, തൊപ്പി, സൺഗ്ലാസ് എന്നിവ മാറ്റുക.
- സ്റ്റെപ്പ് 3: ക്യാമറയിലെ പച്ച വെളിച്ചത്തിലേക്ക് നേരിട്ട് നോക്കുക.
- സ്റ്റെപ്പ് 4: ബയോമെട്രിക് വിവരങ്ങൾ സിസ്റ്റം പരിശോധിച്ച് ഉറപ്പുവരുത്തുന്നത് വരെ കാത്തുനിൽക്കുക (7-13 സെക്കൻഡ്).
- സ്റ്റെപ്പ് 5: വെരിഫിക്കേഷൻ പൂർത്തിയായാൽ ഗേറ്റ് താനേ തുറക്കും. ഉദ്യോഗസ്ഥരുടെ സഹായമോ സീലടിപ്പാക്കലോ ഇല്ലാതെ ഇമിഗ്രേഷൻ പൂർത്തിയാക്കാം.
യൂ.എ.ഇ പൗരന്മാർ, ജി.സി.സി പൗരന്മാർ, യു.എ.ഇ റസിഡന്റ് വിസയുള്ള പ്രവാസികൾ, എത്തുമ്പോൾ വിസ (Visa on Arrival) ലഭിക്കുന്ന രാജ്യങ്ങളിലെ യാത്രക്കാർ എന്നിവർക്കെല്ലാം സ്മാർട്ട് ഗേറ്റ് ഉപയോഗിക്കാം. മുൻപ് ദുബായ് വിമാനത്താവളം വഴി യാത്ര ചെയ്തിട്ടുള്ളവർ ഇമിഗ്രേഷൻ ഘട്ടത്തിൽ തന്നെ സ്വയം സിസ്റ്റത്തിൽ രജിസ്റ്റർ ആയിട്ടുണ്ടാകും.
സ്മാർട്ടിൽ നിന്നും ‘റെഡ് കാർപെറ്റിലേക്ക്’
സ്മാർട്ട് ഗേറ്റുകൾക്കും ഒരു പടി മുകളിലുള്ള ‘ട്രാവൽ വിത്തൗട്ട് ബോർഡേഴ്സ് – റെഡ് കാർപെറ്റ്’ സംവിധാനവും ദുബായ് വിമാനത്താവളത്തിൽ പ്രവർത്തനം ആരംഭിച്ചിട്ടുണ്ട്.
യാത്രക്കാർ ഒരിടത്തും നിൽക്കുകയോ പാസ്‌പോർട്ട് കാണിക്കുകയോ ചെയ്യാതെ നടന്നുപോകുന്ന വഴിയിൽ തന്നെ ബയോമെട്രിക് തിരിച്ചറിയൽ പൂർത്തിയാക്കുന്ന സാങ്കേതികവിദ്യയാണിത്. വെറും 3.4 സെക്കൻഡിൽ ഒരു യാത്രക്കാരന്റെ ഇമിഗ്രേഷൻ പൂർത്തിയാക്കാൻ ഈ നിരയിലൂടെ സാധിക്കും. ഒരേസമയം 10 യാത്രക്കാരുടെ വിവരങ്ങൾ വരെ സ്കാൻ ചെയ്യാൻ ഈ അത്യാധുനിക എ.ഐ സംവിധാനത്തിന് ശേഷിയുണ്ട്.
