യുവാക്കളുടെ ആശയങ്ങളും നേട്ടങ്ങളും പങ്കുവെച്ച് യൂത്ത് കൗൺസിൽ:96 പേർ നേതൃസ്ഥാനങ്ങളിൽ
ദുബായ്:ഓഗസ്റ്റ് 12 -അന്താരാഷ്ട്ര യുവജന ദിനത്തോടനുബന്ധിച്ച് ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സ്–ദുബായ് ആസ്ഥാനത്ത് യുവജന ദിനാഘോഷം സംഘടിപ്പിച്ചു. ജി ഡി ആർ എഫ് എ –ദുബായ് യൂത്ത് കൗൺസിലിന്റെ നേതൃത്വത്തിലായിരുന്നു പരിപാടി.
യുവാക്കളെ ഭാവിയിലെ നേതാക്കളായി വളർത്തിയെടുക്കുന്നതിനും സ്ഥാപനത്തിന്റെ വികസന പ്രവർത്തനങ്ങളിൽ അവരുടെ പങ്കാളിത്തം ശക്തിപ്പെടുത്തുന്നതിനുമുള്ള ഭാഗമായാണ് പരിപാടി.ജി ഡി ആർ എഫ് എ -ദുബായ് ഡെപ്യൂട്ടി ഡയറക്ടർ ജനറൽ മേജർ ജനറൽ ഒബൈദ് മുഹൈർ ബിൻ സുറൂർ, വിവിധ അസിസ്റ്റന്റ് ഡയറക്ടർ ജനറൽമാർ തുടങ്ങിയവർ ചടങ്ങിൽ പങ്കെടുത്തു.
ചടങ്ങിന്റെ ഭാഗമായി യൂത്ത് കൗൺസിലിന്റെ വിവിധ പ്രവർത്തനങ്ങളും പദ്ധതികളും അവയുടെ നേട്ടങ്ങളും വിശദീകരിക്കുന്ന പ്രദർശനം സംഘടിപ്പിച്ചു. യുവാക്കളുടെ നേതൃത്വത്തിൽ നടപ്പാക്കിയ വിവിധ ആശയങ്ങളും പദ്ധതികളും അവ സ്ഥാപനത്തിന്റെ പ്രവർത്തനങ്ങൾക്ക് നൽകുന്ന സംഭാവനകളും പ്രദർശനത്തിൽ അവതരിപ്പിച്ചു.യുവജന കൗൺസിലിന്റെ പ്രവർത്തനങ്ങളുടെ ഫലങ്ങളും പരിപാടിയിൽ അവതരിപ്പിച്ചു. വ്യക്തിഗത നേട്ടങ്ങളെ സ്ഥാപനത്തിന് ദീർഘകാലം പ്രയോജനപ്പെടുന്ന മൂല്യങ്ങളാക്കി മാറ്റുകയാണ് ലക്ഷ്യമെന്ന് അധികൃതർ വ്യക്തമാക്കി.
36 ശതമാനം യുവാക്കൾ
ജി ഡി ആർ എഫ് എ -ദുബായ്യിലെ ആകെ ജീവനക്കാരിൽ 36 ശതമാനം യുവാക്കളാണ്. ഇവരിൽ 96 പേർ സൂപ്പർവൈസറി, നേതൃസ്ഥാനങ്ങളിൽ പ്രവർത്തിക്കുന്നുണ്ട്. യുവാക്കൾക്ക് ഉത്തരവാദിത്തങ്ങൾ ഏറ്റെടുക്കാനും വികസന പദ്ധതികൾക്ക് നേതൃത്വം നൽകാനും തീരുമാനമെടുക്കൽ പ്രക്രിയയിൽ പങ്കാളികളാകാനും അവസരം നൽകുന്നതിന്റെ തെളിവാണിതെന്ന് ജനറൽ ഡയറക്ടറേറ്റ് വ്യക്തമാക്കി
ചടങ്ങിൽ ‘യൂത്ത് ഇംപാക്ട്’ പദ്ധതിയിലെ 12 ജീവനക്കാരെയും ആദരിച്ചു. ഇതിൽ ഏഴ് പേർ 80 ശതമാനത്തിലധികം സ്കോർ നേടി ‘ഡിസ്റ്റിംഗ്വിഷ്ഡ്’ വിഭാഗത്തിലും അഞ്ച് പേർ 70 മുതൽ 80 ശതമാനം വരെ സ്കോർ നേടി ‘അഡ്വാൻസ്ഡ്’ വിഭാഗത്തിലും ഇടം നേടി.യുവാക്കളാണ് സ്ഥാപനങ്ങളുടെ യഥാർഥ സമ്പത്തും ഭാവിയുടെ ചാലകശക്തിയുമെന്ന് ഉപമേധാവി -മേജർ ജനറൽ ഒബൈദ് മുഹൈർ ബിൻ സുറൂർ പറഞ്ഞു. യുവാക്കളുടെ കഴിവുകൾ വികസിപ്പിക്കുന്നതിനൊപ്പം തീരുമാനമെടുക്കുന്നതിലും പുതിയ പദ്ധതികൾക്ക് നേതൃത്വം നൽകുന്നതിലും അവർക്ക് അവസരം നൽകേണ്ടതുണ്ടെന്നും അദ്ദേഹം വ്യക്തമാക്കി.
യുവാക്കളുടെ ആശയങ്ങളെ പ്രായോഗിക പദ്ധതികളാക്കി മാറ്റാനും അവരുടെ കഴിവുകൾ സ്ഥാപനത്തിന്റെ മികവിന് ഉപയോഗപ്പെടുത്താനും കഴിയുന്ന അന്തരീക്ഷമാണ് ജനറൽ ഡയറക്ടറേറ്റ് ഒരുക്കുന്നതെന്നും അദ്ദേഹം പറഞ്ഞു.യുവപ്രതിഭകളെ കണ്ടെത്തി വളർത്തിയെടുക്കുകയും ഭാവിയിലെ നേതാക്കളായി അവരെ സജ്ജരാക്കുകയും ചെയ്യുന്നതാണെന്ന് സമീപനമാണെന്ന് ചടങ്ങ് വ്യക്തമാക്കി. യുവാക്കളുടെ പങ്കാളിത്തത്തിലൂടെ സ്ഥാപനത്തിന്റെ തുടർച്ചയായ വികസനവും മികവും ശക്തിപ്പെടുത്തുകയാണ് ലക്ഷ്യമെന്നും അധികൃതർ വിശദീകരിച്ചു
