ആശയങ്ങൾക്കപ്പുറം സ്ഥിരതയുള്ള ബിസിനസുകൾ കെട്ടിപ്പടുക്കാൻ വിപണിയിലെ തത്സമയ മാറ്റങ്ങൾ ഉൾക്കൊള്ളണമെന്ന് യു.എ.ഇയിലെ പ്രമുഖ സംരംഭകർ.
ഷാർജ, യു.എ.ഇ :ലോക സംരംഭക ദിനത്തോടനുബന്ധിച്ച് യു.എ.ഇയിലെയും മിഡിൽ ഈസ്റ്റിലെയും സ്റ്റാർട്ടപ്പ് മേഖലയ്ക്ക് പുതിയ കരുത്തുപകർന്ന് ഷാർജ എന്റർപ്രണർഷിപ്പ് സെന്റർ (Sheraa). വെറും ആശയങ്ങൾക്കപ്പുറം വിപണിയുടെ യഥാർത്ഥ ആവശ്യങ്ങൾ തിരിച്ചറിഞ്ഞ് പ്രവർത്തിക്കുന്ന സംരംഭങ്ങൾക്കാണ് ദീർഘകാല വിജയം കൈവരിക്കാനാകുന്നതെന്ന് ഷാറ സി.ഇ.ഒ എച്ച്.ഇ സാറ അബ്ദുൽ അസീസ് അൽ നുഐമി വ്യക്തമാക്കി.
ഒരു മികച്ച ആശയം കൊണ്ട് മാത്രം ബിസിനസ് വിജയിക്കണമെന്നില്ലെന്ന് സാറ അൽ നുഐമി ചൂണ്ടിക്കാട്ടി. “സ്വന്തം നിഗമനങ്ങൾ പരീക്ഷിക്കാനുള്ള ധൈര്യവും വിപണിയെ സൂക്ഷ്മമായി നിരീക്ഷിക്കാനുള്ള അച്ചടക്കവും സംരംഭകർക്കുണ്ടാകണം. ബിസിനസിനെ മുന്നോട്ട് നയിക്കുന്ന പങ്കാളിത്തങ്ങളും അവസരങ്ങളും വിനിയോഗിക്കാൻ എപ്പോഴും സന്നദ്ധരായിരിക്കണം,” അവർ പറഞ്ഞു. ഷാർജയെ ആഗോള തലത്തിൽ വളരുന്ന സ്റ്റാർട്ടപ്പുകളുടെ പ്രധാന കേന്ദ്രമാക്കി മാറ്റുന്നതിനുള്ള പിന്തുണ ഷാറ തുടരുമെന്നും അവർ വ്യക്തമാക്കി.
ഷാറയുടെ പിന്തുണയോടെ പ്രവർത്തിക്കുന്ന വിവിധ മേഖലകളിലെ യുവ സംരംഭകരും തങ്ങളുടെ അനുഭവങ്ങൾ പങ്കുവെച്ചു. ഡിഎച്ച്എ (DHA) അംഗീകൃത ഡിജിറ്റൽ മെന്റൽ ഹെൽത്ത് പ്ലാറ്റ്‌ഫോമായ ‘നഫ്സി’യുടെ (Nafsi) സഹസ്ഥാപകൻ തയിബ് ഹസ്സൻ, സേവനങ്ങൾ കൂടുതൽ ആളുകളിലേക്ക് എത്തിക്കുന്നതിന്റെ പ്രാധാന്യം വ്യക്തമാക്കി. നിലവിൽ മിഡിൽ ഈസ്റ്റിൽ 10,000-ത്തിലധികം ഉപയോക്താക്കളും 30-ലധികം കോർപ്പറേറ്റ് പങ്കാളിത്തങ്ങളുമുള്ള പ്രസ്ഥാനമായി നഫ്സി മാറിയിട്ടുണ്ട്.
തങ്ങൾ പരിഹരിക്കാൻ ശ്രമിക്കുന്ന പ്രശ്നത്തെക്കുറിച്ച് വ്യക്തമായ ധാരണയുണ്ടാകുക എന്നതാണ് ബിസിനസിലെ ഏറ്റവും വലിയ വെല്ലുവിളികളെ മറികടക്കാനുള്ള വഴിയെന്ന് ഹസ്സൻ പറഞ്ഞു.
അമിതമായ ചിന്തകൾക്ക് പകരം പ്രായോഗിക പ്രവർത്തനങ്ങൾക്കാണ് മുൻഗണന നൽകേണ്ടതെന്ന് ‘ഡ്രാഗൺ വിത്തിൻ’ സ്ഥാപകൻ നുനോ വെലോസോ അഭിപ്രായപ്പെട്ടു. ബിസിനസ് മാതൃകകളെ മാത്രം ആശ്രയിക്കാതെ സാഹചര്യങ്ങൾക്ക് അനുസരിച്ച് തീരുമാനങ്ങളെടുക്കാനുള്ള കഴിവാണ് സംരംഭകർക്ക് വേണ്ടതെന്ന് അദ്ദേഹം കൂട്ടിച്ചേർത്തു.
ഇവോൾവ് കരിയേഴ്സ് മാനേജിങ് ഡയറക്ടർ ആൻഡി കോക്സൽ, ടീൽ ഫ്ലോറൽ സ്റ്റുഡിയോ സഹസ്ഥാപക നൂറ അൽ സുവൈദി എന്നിവരും ബിസിനസ് വളർച്ചയിലെ സൂക്ഷ്മ കാര്യങ്ങളുടെ പ്രാധാന്യത്തെക്കുറിച്ചും യു.എ.ഇയിലെ നിലവിലെ അനുകൂല അന്തരീക്ഷത്തെക്കുറിച്ചും സംസാരിച്ചു. വരും വർഷങ്ങളിൽ കൂടുതൽ പ്രാദേശിക, അന്തർദേശീയ സംരംഭകർക്ക് മൂലധനവും വിപണി സാധ്യതകളും ലഭ്യമാക്കുമെന്ന് ഷാറ അറിയിച്ചു.
