ദുബൈ: പെരുന്നാൾ നമസ്കാരത്തിനായി പള്ളിയിലെത്തി വിശ്വാസികൾക്കൊപ്പം നമസ്കാര ചലനങ്ങൾ അനുകരിക്കുന്ന ഹ്യൂമനോയിഡ് റോബോട്ടിന്റെ വീഡിയോ സോഷ്യൽ മീഡിയയിൽ വൈറലാകുന്നു. പരമ്പരാഗത എമിറാത്തി വസ്ത്രമായ കന്ദൂരയും ശെമാഗും ധരിച്ചാണ് റോബോട്ട് പള്ളിയിലെത്തിയത്.
‘ബു സുനൈദ’ എന്ന പേരിൽ അറിയപ്പെടുന്ന ‘യൂനിട്രീ ജി1’ (Unitree G1) ഹ്യൂമനോയിഡ് റോബോട്ടിന്റെ ഔദ്യോഗിക ഇൻസ്റ്റഗ്രാം അക്കൗണ്ടിലൂടെയാണ് വീഡിയോ ആദ്യം പങ്കുവെച്ചത്. “അല്ലാഹു നിങ്ങളുടെ നല്ല കർമങ്ങൾ സ്വീകരിക്കട്ടെ. ഈദ് മുബാറക്. നമ്മുടെ പ്രിയപ്പെട്ട കുട്ടികൾക്കായി ഈ വിദ്യാഭ്യാസപരമായ ഉള്ളടക്കം സമർപ്പിക്കുന്നതിൽ ഞങ്ങൾക്ക് സന്തോഷമുണ്ട്” എന്ന സന്ദേശത്തോടെയായിരുന്നു വീഡിയോ പോസ്റ്റ് ചെയ്തത്.
വീഡിയോയിൽ കാറിൽ നിന്ന് ഇറങ്ങി പള്ളിയിലേക്ക് നടന്ന് പ്രവേശിക്കുന്ന റോബോട്ടിനെയാണ് കാണുന്നത്. തുടർന്ന് നമസ്കാരത്തിനിടെ വിശ്വാസികളോടൊപ്പം നിന്നുകൊണ്ട് നമസ്കാരത്തിലെ വിവിധ ചലനങ്ങൾ അനുകരിക്കുന്നതും ദൃശ്യങ്ങളിലുണ്ട്. സാങ്കേതിക വിദ്യയും സാമൂഹിക-സാംസ്കാരിക ജീവിതവും തമ്മിലുള്ള സംയോജനത്തിന്റെ ഉദാഹരണമായാണ് പലരും ഈ വീഡിയോയെ വിശേഷിപ്പിക്കുന്നത്.
കഴിഞ്ഞ ഏതാനും മാസങ്ങളായി യുഎഇയിൽ വലിയ ജനപ്രീതി നേടിയ വ്യക്തിത്വമാണ് ‘ബു സുനൈദ’. പൊതുപരിപാടികളിലും പ്രദർശന വേദികളിലും നഗരവീഥികളിലും സ്ഥിരം സാന്നിധ്യമായ റോബോട്ടിന് സോഷ്യൽ മീഡിയയിലും വലിയ ആരാധകവൃന്ദമുണ്ട്.
ദുബൈ ഭരണാധികാരിയും യുഎഇ വൈസ് പ്രസിഡന്റും പ്രധാനമന്ത്രിയുമായ ശൈഖ് മുഹമ്മദ് ബിൻ റാഷിദ് അൽ മക്തൂമിനൊപ്പം എമിറേറ്റ്സ് ടവറിന് സമീപം പ്രത്യക്ഷപ്പെട്ടതോടെയാണ് ‘ബു സുനൈദ’ രാജ്യവ്യാപകമായി ശ്രദ്ധ നേടിയത്. പിന്നീട് നിരവധി പൊതുപരിപാടികളിൽ പങ്കെടുത്ത റോബോട്ട് സാങ്കേതിക ലോകത്തെ കൗതുക കാഴ്ചകളിലൊന്നായി മാറിയിരിക്കുകയാണ്.
