ഷാർജ: ഷാർജ ഇന്ത്യൻ അസോസിയേഷൻ 2026 ഭരണസമിതി തിരഞ്ഞെടുപ്പ് റദ്ദാക്കി. മെയ് 17 ഞായറാഴ്ച ഷാർജ ഇന്ത്യൻ സ്കൂൾ (ഘുബൈബ ക്യാമ്പസ്) കോംപ്ലക്സിൽ നടത്താനിരുന്ന തിരഞ്ഞെടുപ്പാണ് മാറ്റിവെച്ചത്.
ഷാർജയിലെ ബന്ധപ്പെട്ട പ്രാദേശിക സർക്കാർ വകുപ്പുകളിൽ നിന്ന് ലഭിച്ച നിർദ്ദേശങ്ങളുടെ അടിസ്ഥാനത്തിലാണ് തീരുമാനം കൈക്കൊണ്ടതെന്ന് അസോസിയേഷൻ ഔദ്യോഗികമായി അറിയിച്ചു. യു.എ.ഇ തലസ്ഥാനമായ അബുദാബിയിലെ ഉന്നതാധികാരികളിൽ നിന്ന് തുടർ നിർദ്ദേശങ്ങൾ ലഭ്യമാകുന്നതുവരെയാണ് നിലവിലെ റദ്ദാക്കൽ ബാധകമാകുക.
തിരഞ്ഞെടുപ്പ് നടത്തുന്നതിനുള്ള എല്ലാ തയ്യാറെടുപ്പുകളും പൂർത്തിയായിരുന്നുവെങ്കിലും, യു.എ.ഇയിലെ ഔദ്യോഗിക നിയമങ്ങളും ഭരണപരമായ നിർദ്ദേശങ്ങളും പൂർണമായി പാലിക്കേണ്ട ബാധ്യത അസോസിയേഷനുണ്ടെന്ന് മാനേജിംഗ് കമ്മിറ്റി വ്യക്തമാക്കി.
അപ്രതീക്ഷിതമായ തീരുമാനം മൂലം അംഗങ്ങൾക്കും വോട്ടർമാർക്കും ഉണ്ടായ അസൗകര്യത്തിൽ ഖേദം രേഖപ്പെടുത്തിയ അസോസിയേഷൻ, തിരഞ്ഞെടുപ്പിന്റെ പുതുക്കിയ തീയതി ഉൾപ്പെടെയുള്ള വിവരങ്ങൾ അധികാരികളുടെ നിർദ്ദേശങ്ങൾ ലഭിക്കുന്നതനുസരിച്ച് പിന്നീട് ഔദ്യോഗികമായി അറിയിക്കുമെന്ന് അറിയിച്ചു.
അസോസിയേഷന്റെ സുഗമമായ പ്രവർത്തനങ്ങൾക്ക് അംഗങ്ങളുടെയും പൊതുസമൂഹത്തിന്റെയും സഹകരണം തുടർന്നും പ്രതീക്ഷിക്കുന്നതായും ഭാരവാഹികൾ വ്യക്തമാക്കി.
