ഹെയർഫീൽഡ്, യുകെ : യുകെയിലെ പ്രശസ്തമായ മഗ്ദി യാഖൂബ് ഇൻസ്റ്റിറ്റ്യൂട്ടിന്റെ രക്ഷാധികാരിയായി ഷാർജ റിസർച്ച്, ടെക്നോളജി ആന്റ് ഇന്നൊവേഷൻ പാർക്ക് (SPARK) ചെയർപേഴ്സണും അമേരിക്കൻ യൂണിവേഴ്സിറ്റി ഓഫ് ഷാർജ (AUS) പ്രസിഡന്റുമായ ഷെയ്ഖ ബുദൂർ ബിന്ത് സുൽത്താൻ അൽ ഖാസിമി ചുമതലയേറ്റു. ഹൃദ്രോഗ ചികിത്സാ രംഗത്ത് ആഗോളതലത്തിൽ നടക്കുന്ന ഗവേഷണങ്ങൾക്ക് പിന്തുണ നൽകുന്നതിന്റെ ഭാഗമായാണ് ഈ നടപടി.
യുകെയിലെ ഹെയർഫീൽഡിലുള്ള മഗ്ദി യാഖൂബ് ഇൻസ്റ്റിറ്റ്യൂട്ട് ഹാർട്ട് സയൻസ് സെന്ററിൽ ചൊവ്വാഴ്ച നടന്ന സന്ദർശന വേളയിൽ ഇൻസ്റ്റിറ്റ്യൂട്ട് ഡയറക്ടറും ഹാർട്ട് ബയോടെക് ഹോൾഡിംഗ്സ് ചീഫ് സയന്റിഫിക് ഓഫീസറുമായ പ്രൊഫസർ സർ മഗ്ദി യാഖൂബ് ഷെയ്ഖ ബുദൂറിനെ സ്വീകരിച്ചു.
‘യാഖൂബ് ഹാർട്ട് വാൽവ്’ പദ്ധതി വികസിപ്പിക്കുന്നതിനായി ഹാർട്ട് ബയോടെക് ഹോൾഡിംഗ്സ് ലിമിറ്റഡിൽ 20 ലക്ഷം യുഎസ് ഡോളറിന്റെ (USD 2 million) നിക്ഷേപവും ഷാർജ പ്രഖ്യാപിച്ചിട്ടുണ്ട്. ടിഷ്യൂ എൻജിനീയറിങ്, റീജനറേറ്റീവ് മെഡിസിൻ എന്നിവ ഉപയോഗിച്ച് രോഗികളുടെ ശരീരത്തോട് സ്വാഭാവികമായി ചേർന്നുപോകുന്ന കൃത്രിമ ഹൃദയ വാൽവുകൾ വികസിപ്പിക്കുകയാണ് ഈ പദ്ധതിയുടെ ലക്ഷ്യം.
സന്ദർശനത്തിനിടെ ഹെയർഫീൽഡിലെ ലാബുകൾ സന്ദർശിച്ച ഷെയ്ഖ ബുദൂർ, ഗവേഷകരുമായി ആശയവിനിമയം നടത്തുകയും ഹാർട്ട് വാൽവ് പദ്ധതിയുടെ പുരോഗതി വിലയിരുത്തുകയും ചെയ്തു.
മഗ്ദി യാഖൂബ് ഇൻസ്റ്റിറ്റ്യൂട്ട്, SPARK, അമേരിക്കൻ യൂണിവേഴ്സിറ്റി ഓഫ് ഷാർജ, യൂണിവേഴ്സിറ്റി ഓഫ് ഷാർജ എന്നിവ ചേർന്ന് സംയുക്ത ഗവേഷണ പദ്ധതികൾ ആരംഭിക്കും. ഇതിലൂടെ യുഎഇയിലെ വിദ്യാർത്ഥികൾക്കും ഗവേഷകർക്കും ലണ്ടനിലെ പ്രമുഖ ഗവേഷണ കേന്ദ്രങ്ങളുമായി ചേർന്ന് പ്രവർത്തിക്കാൻ അവസരം ലഭിക്കും.
ശാസ്ത്രത്തിലും സാങ്കേതികവിദ്യയിലും നടത്തുന്ന നിക്ഷേപങ്ങൾ മാനവികതയുടെ വളർച്ചയ്ക്കുള്ളതാണെന്ന് യുഎഇ സുപ്രീം കൗൺസിൽ അംഗവും ഷാർജ ഭരണാധികാരിയുമായ ശൈഖ് ഡോ. സുൽത്താൻ ബിൻ മുഹമ്മദ് അൽ ഖാസിമിയുടെ കാഴ്ചപ്പാട് മുൻനിർത്തി സംസാരിക്കവെ ഷെയ്ഖ ബുദൂർ വ്യക്തമാക്കി.
SPARK ചീഫ് എക്സിക്യൂട്ടീവ് ഓഫീസർ ഹുസൈൻ അൽ മഹ്മൂദി, ഗവൺമെന്റ് ആൻഡ് കോർപ്പറേറ്റ് പാർട്ണർഷിപ്സ് ഡയറക്ടർ ഡോ. അസ്മ മഹ്മൂദ് ഫിക്രി എന്നിവരും ഷാർജ പ്രതിനിധി സംഘത്തിലുണ്ടായിരുന്നു.
