ഡിപ്ലോമാറ്റിക് ബന്ധങ്ങളും സാമ്പത്തിക സഹകരണവും വർധിപ്പിക്കുന്നത് ലക്ഷ്യമിട്ടാണ് ഔദ്യോഗിക സന്ദർശനം.
ബ്രാറ്റിസ്ലാവ : യുഎഇയും സ്ലൊവാക്യയും തമ്മിലുള്ള നയതന്ത്ര ബന്ധം കൂടുതൽ ദൃഢമാക്കുന്നതിന്റെ ഭാഗമായി യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ സ്ലൊവാക് റിപ്പബ്ലിക്കിൽ ഔദ്യോഗിക സന്ദർശനത്തിനായി എത്തിച്ചേർന്നു. ബ്രാറ്റിസ്ലാവയിൽ എത്തിയ യുഎഇ പ്രസിഡന്റിന് സ്ലൊവാക്യൻ സർക്കാരിന്റെ ഉന്നത പ്രതിനിധികളും നയതന്ത്ര ഉദ്യോഗസ്ഥരും ചേര്ന്ന് സ്വീകരണം നൽകി.
പ്രസിഡൻഷ്യൽ കോർട്ട് ഫോർ സ്പെഷ്യൽ അഫയേഴ്സ് ഡെപ്യൂട്ടി ചെയർമാൻ ഷെയ്ഖ് ഹംദാൻ ബിൻ മുഹമ്മദ് ബിൻ സായിദ് അൽ നഹ്യാൻ, യുഎഇ പ്രസിഡന്റിന്റെ ഉപദേഷ്ടാവ് ഷെയ്ഖ് മുഹമ്മദ് ബിൻ ഹമദ് ബിൻ തഹ്നൂൻ അൽ നഹ്യാൻ എന്നിവരടങ്ങുന്ന ഉന്നതതല സംഘമാണ് പ്രസിഡന്റിനെ അനുഗമിക്കുന്നത്. വിവിധ കാബിനറ്റ് മന്ത്രിമാരും ഔദ്യോഗിക പ്രതിനിധികളും സംഘത്തിലുണ്ട്.
മധ്യ യൂറോപ്യൻ രാജ്യങ്ങളുമായുള്ള സാമ്പത്തിക സഹകരണം വിപുലീകരിക്കാനും വ്യാപാരം, നിക്ഷേപം, പുനരുപയോഗ ഊർജം, സാങ്കേതികവിദ്യ തുടങ്ങിയ മേഖലകളിൽ കൂടുതൽ പങ്കാളിത്തം ഉറപ്പാക്കാനും സന്ദർശന വേളയിൽ നടക്കുന്ന ഉഭയകക്ഷി ചർച്ചകൾ വഴിയൊരുക്കും. ഗൾഫ് മേഖലയും മധ്യ യൂറോപ്പും തമ്മിലുള്ള വ്യാപാര ബന്ധം മെച്ചപ്പെടുത്തുന്നതിൽ ഈ സന്ദർശനം സുപ്രധാന പങ്ക് വഹിക്കുമെന്നാണ് വിലയിരുത്തൽ.
സന്ദർശനത്തിന്റെ ഭാഗമായി സ്ലൊവാക്യൻ ഭരണാധികാരികളുമായും മുതിർന്ന ഉദ്യോഗസ്ഥരുമായും യുഎഇ പ്രതിനിധി സംഘം വരും മണിക്കൂറുകളിൽ കൂടുതൽ ചർച്ചകൾ നടത്തും.
