വിദ്യാർഥികൾക്ക് ഉപരിപഠന സാധ്യതകളും അഭിരുചിയും കണ്ടെത്താൻ ‘മിഖ്യാസ്’ ഡിജിറ്റൽ സംവിധാനം; പ്രദർശനം സെപ്റ്റംബർ 29 വരെ.
ഷാർജ, സെപ്റ്റംബർ 21, 2026 : യുഎഇയിലെയും മേഖലയിലെയും സ്കൂൾ വിദ്യാർഥികൾക്ക് ഉപരിപഠന-കരിയർ സാധ്യതകൾ പരിചയപ്പെടുത്തുന്ന എട്ടാമത് ഷാർജ യൂണിവേഴ്സിറ്റി മേജേഴ്സ് എക്സിബിഷന് തുടക്കമായി. ഷാർജ ബുക്ക് അതോറിറ്റി ആസ്ഥാനത്ത് ആരംഭിച്ച മേളയിൽ 23 പ്രമുഖ സർവകലാശാലകളും അക്കാദമിക് സ്ഥാപനങ്ങളും പങ്കെടുക്കുന്നുണ്ട്.
ഷാർജ പബ്ലിക് ലൈബ്രറീസ് സംഘടിപ്പിക്കുന്ന പ്രദർശനം സെപ്റ്റംബർ 29 വരെ നീണ്ടുനിൽക്കും. “പാത്ത് ടു ദ ഫ്യൂച്ചർ: വെയർ ആംബിഷൻ മീറ്റ്സ് അച്ചീവ്മെന്റ്” എന്ന പ്രമേയത്തിലാണ് ഇത്തവണത്തെ പരിപാടി. ഷാർജ ബുക്ക് അതോറിറ്റി സിഇഒ അഹമ്മദ് ബിൻ റക്കാദ് അൽ അമേരി, സായിദ് മിലിട്ടറി യൂണിവേഴ്സിറ്റിയിലെ സ്റ്റാഫ് കേണൽ സുൽത്താൻ അഹമ്മദ് അൽ അലി, ഷാർജ പബ്ലിക് ലൈബ്രറീസ് ഡയറക്ടർ ഈമാൻ ബുഷ്ലൈബി എന്നിവർ ചേർന്ന് ഉദ്ഘാടനം നിർവഹിച്ചു. ആദ്യ ദിനം 924 വിദ്യാർഥിനികളാണ് പ്രദർശനം സന്ദർശിച്ചത്.
വിദ്യാർഥികളുടെ അഭിരുചികളും കഴിവുകളും വിലയിരുത്തി അവർക്ക് അനുയോജ്യമായ കോഴ്സുകളും തൊഴിൽ മേഖലകളും നിർദേശിക്കുന്ന “മിഖ്യാസ്” എന്ന പുതിയ ഇന്ററാക്ടീവ് ഡിജിറ്റൽ സംവിധാനം ഇത്തവണത്തെ പ്രധാന സവിശേഷതയാണ്. സ്ക്രീനുകളിൽ ക്രമീകരിച്ചിരിക്കുന്ന ലളിതമായ ചോദ്യാവലികൾ വഴി വിദ്യാർഥികൾക്ക് തങ്ങളുടെ അഭിരുചി കണ്ടെത്താനാകും.
പ്രദർശനത്തോടനുബന്ധിച്ച് 36 പ്രത്യേക സെഷനുകളും ശിൽപശാലകളും നടക്കും. “ഫ്യൂച്ചർ ഡയലോഗ്സ്”, “പൾസ് ഓഫ് ദ മേജർ” എന്നീ രണ്ട് വിഭാഗങ്ങളിലായാണ് ഇവ ക്രമീകരിച്ചിരിക്കുന്നത്. കോഴ്സ് തിരഞ്ഞെടുപ്പ്, സ്കോളർഷിപ്പ് സാധ്യതകൾ, കരിയർ പ്ലാനിങ്, ആർട്ടിഫിഷ്യൽ ഇന്റലിജൻസ് തൊഴിൽരംഗത്തുണ്ടാക്കുന്ന മാറ്റങ്ങൾ എന്നിവയെക്കുറിച്ചുള്ള ക്ലാസുകൾ വരും ദിവസങ്ങളിൽ നടക്കും. ഷാർജ ഇൻവെസ്റ്റ്മെന്റ് ആൻഡ് ഡെവലപ്മെന്റ് അതോറിറ്റി (ശുറൂഖ്) യൂത്ത് കൗൺസിൽ, ഷാർജ ഹ്യൂമൻ റിസോഴ്സസ് വകുപ്പ്, വിവിധ സർവകലാശാലാ അധ്യാപകർ എന്നിവരാണ് സെഷനുകൾക്ക് നേതൃത്വം നൽകുന്നത്.
ഖലീഫ യൂണിവേഴ്സിറ്റി, അമേരിക്കൻ യൂണിവേഴ്സിറ്റി ഓഫ് ഷാർജ, യുണിവേഴ്സിറ്റി ഓഫ് ഷാർജ, ഹയർ കോളേജസ് ഓഫ് ടെക്നോളജി, ദുബായ് പൊലീസ് അക്കാദമി, ഷാർജ മാരിടൈം അക്കാദമി തുടങ്ങി യുഎഇയിലെ പ്രമുഖ വിദ്യാഭ്യാസ സ്ഥാപനങ്ങളുടെ സ്റ്റാളുകൾ മേളയിലുണ്ട്. യൂണിവേഴ്സിറ്റി ഓഫ് കൽബ, എമിറേറ്റ്സ് ഏവിയേഷൻ യൂണിവേഴ്സിറ്റി എന്നീ സ്ഥാപനങ്ങൾ ആദ്യമായാണ് എക്സിബിഷന്റെ ഭാഗമാകുന്നത്.
മേളയോടനുബന്ധിച്ച് ഷാർജ പബ്ലിക് ലൈബ്രറി അംഗത്വ ഫീസിൽ 50 ശതമാനം ഇളവ് പ്രഖ്യാപിച്ചിട്ടുണ്ട്.
രാവിലെ 9:00 മുതൽ ഉച്ചയ്ക്ക് 1:00 വരെയാണ് സന്ദർശന സമയം. തിരക്ക് നിയന്ത്രിക്കുന്നതിനായി വിവിധ ദിവസങ്ങളിലായാണ് പ്രവേശനം ക്രമീകരിച്ചിരിക്കുന്നത്:
- സെപ്റ്റംബർ 21, 22: വിദ്യാർഥിനികൾക്ക്
- സെപ്റ്റംബർ 23, 24: വിദ്യാർഥികൾക്ക്
- സെപ്റ്റംബർ 28, 29: ഇന്റർനാഷണൽ സ്കൂൾ വിദ്യാർഥികൾക്ക്
2018-ൽ 683 സന്ദർശകരുമായി ആരംഭിച്ച മേളയിൽ 2025-ൽ ആറായിരത്തോളം വിദ്യാർഥികളാണ് പങ്കെടുത്തത്. മുൻ വർഷങ്ങളെ അപേക്ഷിച്ച് സന്ദർശകരുടെ എണ്ണത്തിൽ വലിയ വർധനവാണ് രേഖപ്പെടുത്തുന്നത്.
