അജ്മാൻ: കുടുംബ വർഷത്തോടനുബന്ധിച്ച് അൽ ജർഫ്-2 പ്രദേശത്ത് പുതിയ ഫാമിലി പാർക്ക് തുറന്നു. അജ്മാൻ നഗരസഭ വകുപ്പ് ഡയറക്ടർ ജനറൽ അബ്ദുറഹ്മാൻ മുഹമ്മദ് അൽ നുഐമി പാർക്ക് ഉദ്ഘാടനം ചെയ്തു.
ലോകത്തിലെ മുൻനിര ഹരിത നഗരങ്ങളുടെ പട്ടികയിൽ അജ്മാനെ ഉൾപ്പെടുത്തുക എന്ന ലക്ഷ്യത്തോടെ സുസ്ഥിര വികസന പദ്ധതിയുടെ ഭാഗമായാണ് പാർക്ക് ഒരുക്കിയതെന്ന് അദ്ദേഹം പറഞ്ഞു. കുടുംബങ്ങൾക്കും സന്ദർശകർക്കും പ്രകൃതിസൗഹൃദ വിനോദസൗകര്യം നൽകുകയും എമിറേറ്റിലെ ഹരിത ഇടങ്ങൾ വർധിപ്പിക്കുകയും ചെയ്യുകയാണ് പദ്ധതിയുടെ ലക്ഷ്യം.
2024ൽ ആരംഭിച്ച റെസിഡൻഷ്യൽ പാർക്സ് പ്രോജക്റ്റിന്റെ ഭാഗമായാണ് ഈ പാർക്ക് നിർമ്മിച്ചത്. ആറ് പാർക്കുകൾ പൂർത്തിയായതോടെ പദ്ധതി 2028 വരെ തുടരുകയും കൂടുതൽ പാർക്കുകൾ നിർമ്മിക്കാനുമാണ് ലക്ഷ്യം.
6,000 ചതുരശ്ര മീറ്റർ വിസ്തൃതിയുള്ള പാർക്കിൽ 300 മീറ്റർ നീളമുള്ള നടപ്പാത, കുട്ടികളുടെ കളിസ്ഥലം, പാർക്കിങ് സൗകര്യം, തണലുള്ള ഇരിപ്പിടങ്ങൾ എന്നിവ ഒരുക്കിയിട്ടുണ്ട്. പുനരുപയോഗം ചെയ്ത വെള്ളം ഉപയോഗിക്കുന്ന സംവിധാനവും സൗരോർജ്ജത്തിൽ പ്രവർത്തിക്കുന്ന ലൈറ്റിങും വിവിധതരം മരങ്ങളും കുറ്റിച്ചെടികളും ഉൾപ്പെടുത്തിയ സ്മാർട്ട് ഇറിഗേഷൻ സംവിധാനവും പാർക്കിൽ സ്ഥാപിച്ചിട്ടുണ്ട്.
