ദുബായ്: ആഘോഷവേളകളിൽ പ്രിയപ്പെട്ടവരിൽ നിന്ന് അകന്നു കഴിയുന്നവരുടെ വേദനയകറ്റാൻ സ്നേഹസ്പർശവുമായി ദുബായ് ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സ് (GDRFA). അൽ അവീറിലെ നിയമലംഘകരുടെ താമസകേന്ദ്രത്തിലുള്ള (Follow-up and Investigation Center) അന്തേവാസികൾക്കായി ‘ഈദ് ഹോസ്പിറ്റാലിറ്റി’ എന്ന പേരിൽ പ്രത്യേക പദ്ധതിയാണ് അധികൃതർ നടപ്പിലാക്കിയത്.
പെരുന്നാൾ ദിനത്തിൽ നാട്ടിലുള്ള കുടുംബാംഗങ്ങളെ വീഡിയോ കോളിലൂടെ കണ്ട് സംസാരിക്കാൻ അന്തേവാസികൾക്ക് ഇതിലൂടെ അവസരം ലഭിച്ചു. ജയിലിലെ ഒറ്റപ്പെടലിൽ കഴിയുന്നവർക്ക് ഈ നീക്കം വലിയ മാനസികാശ്വാസമാണ് പകർന്നു നൽകിയത്. വീഡിയോ കോൾ സൗകര്യത്തിന് പുറമെ, പ്രിയപ്പെട്ടവരെ വിളിക്കാനായി സൗജന്യ മൊബൈൽ ഫോൺ കാർഡുകളും അധികൃതർ വിതരണം ചെയ്തു.
ആഘോഷങ്ങളിൽ ആരും ഒറ്റപ്പെടരുത് എന്ന മാനവിക സന്ദേശം ഉയർത്തിപ്പിടിച്ചാണ് ദുബായ് ഭരണകൂടം ഇത്തരമൊരു കാരുണ്യപ്രവൃത്തിക്ക് മുൻകൈ എടുത്തത്. വനിതാ അന്തേവാസികൾ അടക്കമുള്ള നിരവധിയാളുകൾ ഈ സൗകര്യം ഉപയോഗപ്പെടുത്തി വൈകാരികമായി തങ്ങളുടെ കുടുംബങ്ങളുമായി പെരുന്നാൾ സന്തോഷം പങ്കുവെച്ചു.
English Summary : The Dubai GDRFA launched the ‘Eid Hospitality’ initiative at the Al Aweer Follow-up and Investigation Center to support inmates during Eid-ul-Fitr. The program provided residents with video calling facilities and free mobile cards to connect with their families back home, emphasizing Dubai’s commitment to humanitarian values and emotional well-being during festive seasons.
