ദുബൈ: ആയുധങ്ങളുമായി പരസ്യമായി സംഘർഷത്തിലേർപ്പെട്ട യുവാക്കളുടെ സംഘത്തെ ദുബൈ പൊലീസ് അറസ്റ്റ് ചെയ്തു. പൊതുസ്ഥലത്ത് നടന്ന കയ്യാങ്കളിക്കിടെ സംഘത്തിലെ ഒരാൾ സംഭവത്തിന്റെ ദൃശ്യങ്ങൾ മൊബൈൽ ഫോണിൽ പകർത്തി സമൂഹ മാധ്യമങ്ങളിലൂടെ പ്രചരിപ്പിച്ചതായും പൊലീസ് വ്യക്തമാക്കി.
സംഭവം ശ്രദ്ധയിൽപ്പെട്ടതിനെ തുടർന്ന് നടത്തിയ അന്വേഷണത്തിലാണ് പ്രതികളെ തിരിച്ചറിഞ്ഞ് പൊലീസ് പിടികൂടിയത്. പൊതുസുരക്ഷക്കും സമൂഹത്തിലെ സമാധാനത്തിനും ഭീഷണിയാകുന്ന ഇത്തരം പ്രവൃത്തികൾക്കെതിരെ കർശന നടപടി സ്വീകരിക്കുമെന്ന് ദുബൈ പൊലീസ് മുന്നറിയിപ്പ് നൽകി.
അറസ്റ്റിലായവരെ തുടർ നിയമ നടപടികൾക്കായി ബന്ധപ്പെട്ട അതോറിറ്റികൾക്ക് കൈമാറിയതായും അധികൃതർ അറിയിച്ചു. സമൂഹത്തിൽ ഭീതിയും അക്രമാന്തരീക്ഷവും സൃഷ്ടിക്കുന്ന തരത്തിലുള്ള പെരുമാറ്റങ്ങൾ ഒരിക്കലും അംഗീകരിക്കില്ലെന്നും പൊലീസ് വ്യക്തമാക്കി.
അതേസമയം, സംശയാസ്പദമായ സംഭവങ്ങളോ നിയമലംഘനങ്ങളോ ശ്രദ്ധയിൽപ്പെട്ടാൽ ദുബൈ പൊലീസ് സ്മാർട്ട് ആപ്ലിക്കേഷനിലെ ‘Police Eye’ സേവനം വഴിയോ 999 എന്ന കമാൻഡ് ആൻഡ് കൺട്രോൾ സെന്റർ നമ്പറിലോ വിവരം അറിയിക്കണമെന്ന് പൊതുജനങ്ങളോട് അഭ്യർഥിച്ചു.
