ആലപ്പുഴ/കൊച്ചി: സിപിഎം വിട്ട മുൻമന്ത്രി ജി. സുധാകരൻ അമ്പലപ്പുഴ മണ്ഡലത്തിൽ സ്വതന്ത്ര സ്ഥാനാർഥിയായി നിയമസഭാ തിരഞ്ഞെടുപ്പിൽ മത്സരിക്കുമെന്ന് പ്രഖ്യാപിച്ചു. വ്യാഴാഴ്ച രാവിലെ പുന്നപ്ര–പറവൂരിലെ വീട്ടിൽ നടത്തിയ വാർത്താസമ്മേളനത്തിലാണ് അദ്ദേഹം തീരുമാനം വ്യക്തമാക്കിയത്.
കമ്യൂണിസ്റ്റ് പാർട്ടിക്കെതിരെ ഒന്നും പറയില്ലെന്നും ആരെയും വ്യക്തിപരമായി ആക്രമിക്കില്ലെന്നും സുധാകരൻ പറഞ്ഞു. സ്വതന്ത്ര സ്ഥാനാർഥിയായാണ് മത്സരിക്കുന്നതെന്നും ഇപ്പോൾ ആരുടെയും പിന്തുണ തേടിയിട്ടില്ലെന്നും അദ്ദേഹം വ്യക്തമാക്കി. പിന്തുണ സ്വീകരിക്കുമോ എന്നത് പിന്നീട് തീരുമാനിക്കുമെന്നും അദ്ദേഹം കൂട്ടിച്ചേർത്തു.
ഇതിനിടെ, സുധാകരനെ പിന്തുണയ്ക്കുന്ന കാര്യത്തിൽ ആലോചിച്ച ശേഷം തീരുമാനമെടുക്കുമെന്ന് പ്രതിപക്ഷ നേതാവ് വി.ഡി. സതീശൻ പറഞ്ഞു. സിപിഎം ഇന്ന് എത്തിച്ചേർന്നിരിക്കുന്ന അവസ്ഥയുടെ ഏറ്റവും പുതിയ ഉദാഹരണമാണ് സുധാകരന്റെ നിലപാടെന്നും അദ്ദേഹം അഭിപ്രായപ്പെട്ടു. എതിര് കക്ഷികളിൽ പോലും ആദരവ് നേടിയ നേതാവാണ് സുധാകരനെന്നും സതീശൻ വ്യക്തമാക്കി. എന്നാൽ ഉടൻ പിന്തുണ പ്രഖ്യാപിക്കാതെ കരുതലോടെയാണ് അദ്ദേഹം പ്രതികരിച്ചത്.
അതേസമയം, സുധാകരനോട് യാതൊരു അവഗണനയും കാണിച്ചിട്ടില്ലെന്ന് സിപിഎം ആലപ്പുഴ ജില്ലാ സെക്രട്ടറി ആർ. നാസർ പറഞ്ഞു. തിരഞ്ഞെടുപ്പിൽ സ്വതന്ത്രനായി മത്സരിക്കുമെന്ന തീരുമാനത്തിൽ നിന്ന് സുധാകരൻ പിന്മാറുമെന്നാണ് പ്രതീക്ഷിക്കുന്നതെന്നും അദ്ദേഹം പറഞ്ഞു.
സിപിഎം നേതാക്കളുടെ സംഘം കഴിഞ്ഞ രാത്രി സുധാകരന്റെ വീട്ടിലെത്തി വാർത്താസമ്മേളനം മാറ്റണമെന്നും തിരഞ്ഞെടുപ്പിൽ സ്വതന്ത്രനായി മത്സരിക്കരുതെന്നും ആവശ്യപ്പെട്ടിരുന്നു. സംസ്ഥാന നേതൃത്വത്തിന്റെ നിർദേശപ്രകാരമായിരുന്നു ഈ കൂടിക്കാഴ്ച.
പാർട്ടിക്കായി ജീവിതം സമർപ്പിച്ച വ്യക്തിയാണെന്നും പാർട്ടിയെ ആക്ഷേപിക്കാനില്ലെന്നും സുധാകരൻ വാർത്താസമ്മേളനത്തിൽ പറഞ്ഞു. കമ്മ്യൂണിസ്റ്റ് ആശയങ്ങളിൽ ഇപ്പോഴും വിശ്വാസമുണ്ടെന്നും അഴിമതിക്കെതിരെ പോരാട്ടം തുടരുമെന്നും അദ്ദേഹം വ്യക്തമാക്കി.
English Summary: Former Kerala minister G. Sudhakaran announced that he will contest the Ambalappuzha constituency as an independent candidate after leaving the CPM. Opposition leader V. D. Satheesan said the decision to support him will be taken after discussions.
