റോളയിൽ പ്രവർത്തനമാരംഭിച്ച പുതിയ മന്ദിരം കല്യാൺ സിൽക്സിന്റെ 37-ാമത് ആഗോള ശാഖയാണ്.
ഷാർജ — 2026 ഓഗസ്റ്റ് 6:ഏഷ്യയിലെ മുൻനിര വസ്ത്രശൃംഖലയായ കല്യാൺ സിൽക്സ് ഷാർജയിലെ മൂന്നാമത്തെ ഷോറൂം റോളയിൽ തുറന്നു. ഇതോടെ ബ്രാൻഡിന്റെ ആഗോള നെറ്റ്വർക്കിലെ ശാഖകളുടെ എണ്ണം 37 ആയി ഉയർന്നു.
ഷാർജ റോളയിൽ സജ്ജമാക്കിയ പുതിയ ഷോറൂമിന്റെ ഉദ്ഘാടനം ശൈഖ് അബ്ദുള്ള മുഹമ്മദ് അൽ ഖാസിമി നിർവഹിച്ചു. വിവാഹ വസ്ത്രങ്ങൾ, ഡിസൈനർ സാരികൾ, സിൽക്ക് സാരികൾ, പുരുഷന്മാർക്കും കുട്ടികൾക്കുമുള്ള റെഡിമേഡ് വസ്ത്രങ്ങൾ എന്നിവയാണ് പുതിയ സ്റ്റോറിലെ പ്രധാന ആകർഷണം.
കല്യാൺ സിൽക്സ് ചെയർമാൻ ടി.എസ്. പട്ടാഭിരാമൻ, എക്സിക്യൂട്ടീവ് ഡയറക്ടർ മഹേഷ് പട്ടാഭിരാമൻ, മിഡിൽ ഈസ്റ്റ് ഓപ്പറേഷൻസ് സിഇഒ ധനിൽ കല്യാൺ, ഒ.എസ്. ബാബുസ്വാമി, ഉണ്ണി മേനോൻ, ശൈലേന്ദ്ര ത്യാഗരാജൻ, അനന്തരാമൻ, വി.ടി. സലിം എന്നിവർ ചടങ്ങിൽ പങ്കെടുത്തു.
ഇന്ത്യയിലെ തനത് നെയ്ത്തു കേന്ദ്രങ്ങളിൽ കമ്പനിയുടെ സ്വന്തം തറികളിൽ നിന്ന് നേരിട്ട് എത്തിക്കുന്ന ശുദ്ധമായ പട്ടുസാരികളുടെ വിപുലമായ ശേഖരം ഇവിടെ ഒരുക്കിയിട്ടുണ്ട്. പ്രവാസി സമൂഹത്തിന്റെ ആഗ്രഹങ്ങൾക്കനുസൃതമായ കളക്ഷനുകളാണ് ഷോറൂമിൽ അവതരിപ്പിച്ചിരിക്കുന്നത്.
ജിസിസി മേഖലയിലെ മുൻനിര നഗരങ്ങളിൽ സാന്നിധ്യം ശക്തമാക്കുന്നതിന്റെ ഭാഗമായാണ് ഷാർജയിലെ പുതിയ വിപുലീകരണം.
