ദുബായ്: ദുബായിലെ സ്കൂൾ മേഖലകളിലെ കടുത്ത ഗതാഗതക്കുരുക്കിന് പരിഹാരം കാണുന്നതിനായി നൂതനമായ ‘സ്കൂൾ ട്രാൻസ്പോർട്ട് പൂളിംഗ്’ (School Transport Pooling) പദ്ധതിയുമായി റോഡ്സ് ആൻഡ് ട്രാൻസ്പോർട്ട് അതോറിറ്റി (RTA). 2026-ന്റെ ആദ്യ പാദത്തിൽ പരീക്ഷണാടിസ്ഥാനത്തിൽ ആരംഭിക്കുന്ന ഈ പദ്ധതി, ആധുനിക സാങ്കേതികവിദ്യയുടെ സഹായത്തോടെ വിദ്യാർത്ഥികളുടെ യാത്ര കൂടുതൽ സുഗമവും ചെലവ് കുറഞ്ഞതുമാക്കാൻ ലക്ഷ്യമിടുന്നു. പ്രമുഖ ആഗോള സാങ്കേതിക കമ്പനിയായ യാംഗോ ഗ്രൂപ്പ് (Yango Group), അർബൻ എക്സ്പ്രസ് ട്രാൻസ്പോർട്ട് (Urban Express Transport) എന്നിവയുമായി സഹകരിച്ചാണ് ആർടിഎ ഈ സ്മാർട്ട് ഗതാഗത സംവിധാനം നടപ്പിലാക്കുന്നത്.
നിലവിൽ സ്കൂൾ സമയങ്ങളിൽ സ്വകാര്യ വാഹനങ്ങളുടെ വർദ്ധനവ് മൂലം സ്കൂൾ പരിസരങ്ങളിൽ അനുഭവപ്പെടുന്ന വലിയ തിരക്ക് കുറയ്ക്കുക എന്നതാണ് പദ്ധതിയുടെ പ്രധാന ലക്ഷ്യം. ഒരേ ദിശയിലോ ഒരേ ഭൂമിശാസ്ത്രപരമായ മേഖലയിലോ ഉള്ള വിവിധ സ്കൂളുകളിലെ വിദ്യാർത്ഥികൾക്കായി പൊതുവായ ബസ് സർവീസുകൾ ലഭ്യമാക്കുന്നതാണ് ഈ ‘പൂളിംഗ്’ രീതി. ഇതുവഴി നിരത്തിലിറങ്ങുന്ന സ്വകാര്യ വാഹനങ്ങളുടെ എണ്ണം ഗണ്യമായി കുറയ്ക്കാനും പരിസ്ഥിതി സൗഹൃദവും സുസ്ഥിരവുമായ ഒരു യാത്രാസംസ്കാരം വളർത്താനും സാധിക്കുമെന്ന് ആർടിഎ പബ്ലിക് ട്രാൻസ്പോർട്ട് ഏജൻസി സിഇഒ അഹമ്മദ് ഹാഷിം ബഹ്റൂസിയാൻ വ്യക്തമാക്കി.
പദ്ധതിയുടെ ഭാഗമായി അത്യാധുനിക ട്രാക്കിംഗ് സംവിധാനങ്ങളും ട്രിപ്പ് മാനേജ്മെന്റ് സൊല്യൂഷനുകളും ബസ്സുകളിൽ ഏർപ്പെടുത്തും. മാതാപിതാക്കൾക്ക് തങ്ങളുടെ കുട്ടികളുടെ യാത്ര തത്സമയം നിരീക്ഷിക്കാൻ സ്മാർട്ട് ആപ്പുകൾ വഴി സാധിക്കുമെന്നത് പദ്ധതിയുടെ സുരക്ഷാ വിശ്വാസ്യത വർദ്ധിപ്പിക്കുന്നു. വിദ്യാർത്ഥികളുടെ സുരക്ഷയ്ക്കായി ഏർപ്പെടുത്തിയിട്ടുള്ള കർശനമായ മാനദണ്ഡങ്ങൾ പാലിച്ചുകൊണ്ടായിരിക്കും സർവീസുകൾ പ്രവർത്തിക്കുക. ഡാറ്റാ അധിഷ്ഠിതമായി റൂട്ടുകൾ മുൻകൂട്ടി നിശ്ചയിക്കുന്നതിലൂടെ യാത്രാ സമയം ലാഭിക്കാനും കൃത്യസമയത്ത് കുട്ടികളെ സ്കൂളുകളിൽ എത്തിക്കാനും സാധിക്കുമെന്ന് യാംഗോ ഗ്രൂപ്പ് പ്രതിനിധികൾ അറിയിച്ചു.
ദുബായിലെ ഗതാഗത മേഖലയെ ഡിജിറ്റലൈസ് ചെയ്യുന്നതിന്റെയും സ്മാർട്ട് സിറ്റി ലക്ഷ്യങ്ങൾ കൈവരിക്കുന്നതിന്റെയും ഭാഗമായാണ് ഈ പുതിയ ചുവടുവെപ്പ്. പരീക്ഷണ ഘട്ടം വിജയകരമായാൽ എമിറേറ്റിലെ കൂടുതൽ സ്കൂളുകളിലേക്ക് പദ്ധതി വ്യാപിപ്പിക്കാനാണ് അധികൃതർ ആലോചിക്കുന്നത്. ഗതാഗതക്കുരുക്ക് കുറയ്ക്കുന്നതിനൊപ്പം രക്ഷിതാക്കൾക്ക് കുറഞ്ഞ നിരക്കിൽ സുരക്ഷിതമായ യാത്രാ സൗകര്യം ഉറപ്പാക്കാൻ ഈ നീക്കം ഉപകരിക്കും. വരും വർഷങ്ങളിൽ ദുബായിലെ സ്കൂൾ യാത്രകളുടെ മുഖച്ഛായ തന്നെ മാറ്റാൻ ഈ പദ്ധതിക്ക് കഴിയുമെന്നാണ് പ്രതീക്ഷിക്കപ്പെടുന്നത്.
