തുടർച്ചയായി മൂന്ന് വർഷത്തെ യുഎഇ റെസിഡൻസിയും നേരിട്ടുള്ള ഫ്ലൈറ്റ് ടിക്കറ്റുമുള്ളവർക്കാണ് മേയ് 1 മുതൽ ഒക്ടോബർ 1 വരെ പ്രവേശനം അനുവദിക്കുന്നത്.
ദുബായ് : യുഎഇയിലെ ദീർഘകാല പ്രവാസി താമസക്കാർക്ക് സർപ്രൈസ് യാത്രാ ഇളവുമായി മോണ്ടിനെഗ്രോ. കുറഞ്ഞത് തുടർച്ചയായി മൂന്ന് വർഷത്തെ സാധുതയുള്ള യുഎഇ റെസിഡൻസി വിസയുള്ള വിദേശ പൗരന്മാർക്ക് ഈ വേനൽക്കാലത്ത് വീസയില്ലാതെ 10 ദിവസം വരെ മോണ്ടിനെഗ്രോയിൽ തങ്ങാമെന്ന് രാജ്യത്തിന്റെ വിദേശകാര്യ മന്ത്രാലയം വ്യക്തമാക്കി.
ഗൾഫ് മേഖലയിൽ നിന്നുള്ള വിനോദസഞ്ചാരികളെ ആകർഷിക്കുന്നതിന്റെ ഭാഗമായാണ് മോണ്ടിനെഗ്രോ വിദേശകാര്യ മന്ത്രാലയം താൽക്കാലിക വീസ ഇളവ് പ്രഖ്യാപിച്ചത്. നിശ്ചിത മാനദണ്ഡങ്ങൾ പാലിക്കുന്ന യുഎഇ റെസിഡന്റ് വിസയുള്ള വിദേശ പൗരന്മാർക്ക് മുൻകൂട്ടി വീസ എടുക്കാതെ തന്നെ രാജ്യത്തേക്ക് പ്രവേശിക്കാം.
2026 മേയ് 1 മുതൽ ഒക്ടോബർ 1 വരെയുള്ള വേനൽക്കാല സീസണിലാണ് ഈ ആനുകൂല്യം ലഭ്യമാകുക. രാജ്യത്തേക്ക് എത്തുന്ന സഞ്ചാരികൾ യുഎഇയിൽ നിന്ന് മോണ്ടിനെഗ്രോയിലേക്ക് നേരിട്ടുള്ള വിമാനങ്ങളിൽ വേണം യാത്ര ചെയ്യാൻ. ഒപ്പം യാത്രക്കാരുടെ പാസ്പോർട്ടിന് ആവശ്യമായ സാധുതയും അംഗീകൃത ടൂർ പാക്കേജ് ബുക്കിങ് രേഖകളും വിമാനത്താവളത്തിൽ ഹാജരാക്കേണ്ടതുണ്ട്.
വേനൽക്കാലത്ത് മിഡിൽ ഈസ്റ്റിൽ നിന്ന് യൂറോപ്യൻ രാജ്യങ്ങളിലേക്കുള്ള യാത്രാ തിരക്ക് കണക്കിലെടുത്താണ് നടപടി. പൊതുവെ ഗൾഫിലുള്ള പല വിദേശ രാജ്യങ്ങളിലെ പൗരന്മാർക്കും ബാൽക്കൻ രാജ്യങ്ങൾ സന്ദർശിക്കാൻ മുൻകൂട്ടിയുള്ള വീസ നടപടിക്രമങ്ങൾ അത്യാവശ്യമാണ്. പുതിയ ഇളവ് പ്രവാസികൾക്ക് യാത്രാ നടപടികൾ എളുപ്പമാക്കും.
ജിസിസി പ്രവാസികൾക്ക് ഇളവുകൾ നൽകുന്ന മറ്റ് രാജ്യങ്ങളുടെ പട്ടികയിലേക്കാണ് മോണ്ടിനെഗ്രോയും എത്തുന്നത്. നിലവിൽ ജോർജിയ, അസർബൈജാൻ, അർമേനിയ, ഉസ്ബെക്കിസ്ഥാൻ തുടങ്ങിയ രാജ്യങ്ങളും യുഎഇ റെസിഡൻസി ഉള്ളവർക്ക് വീസ ഓൺ അറൈവൽ, ഇ-വീസ അല്ലെങ്കിൽ വീസ രഹിത പ്രവേശനം നൽകിവരുന്നുണ്ട്.
യുഎഇയിൽ നിന്ന് മോണ്ടിനെഗ്രോയിലേക്ക് യാത്ര പ്ലാൻ ചെയ്യുന്നവർ തങ്ങളുടെ റെസിഡൻസി കാലാവധി തുടർച്ചയായി മൂന്ന് വർഷം പൂർത്തിയായിട്ടുണ്ടെന്നും യാത്രാ രേഖകൾ കൃത്യമാണെന്നും ഉറപ്പാക്കണമെന്ന് ട്രാവൽ ഏജൻസികൾ നിർദേശിക്കുന്നു.
