ദുബായ്: യുണൈറ്റഡ് അറബ് എമിറേറ്റ്സിലെ പ്രമുഖ ഭക്ഷ്യ വിതരണ ബ്രാൻഡായ ടേസ്റ്റി ഫുഡ് സംഘടിപ്പിച്ച ‘ടേസ്റ്റ് ദി ത്രില്ല്’ നാഷണൽ പ്രൊമോഷന് പ്രൗഢഗംഭീരമായ സമാപനം. ഒക്ടോബർ 8 മുതൽ ഡിസംബർ 6 വരെ നീണ്ടുനിന്ന ഈ മെഗാ പ്രൊമോഷനിലൂടെ ലക്ഷക്കണക്കിന് ഉപഭോക്താക്കളെ ആവേശത്തിലാഴ്ത്തിക്കൊണ്ടാണ് വിജയികളെ പ്രഖ്യാപിച്ചത്. യുഎഇയിലുടനീളമുള്ള ആയിരക്കണക്കിന് ഔട്ട്ലെറ്റുകൾ വഴി വിതരണം ചെയ്ത ടേസ്റ്റി ഫുഡ് ഉൽപ്പന്നങ്ങളിലെ കൂപ്പണുകൾ വഴിയാണ് ഉപഭോക്താക്കൾ ഈ മത്സരത്തിന്റെ ഭാഗമായത്. സാധാരണക്കാർക്ക് പോലും വളരെ എളുപ്പത്തിൽ പങ്കാളികളാകാൻ സാധിച്ചുവെന്നതാണ് ഈ കാമ്പയിനെ മറ്റു പ്രൊമോഷനുകളിൽ നിന്ന് വേറിട്ട് നിർത്തിയത്.
ദുബായിലെ സെവൻ സീസ് ഹോട്ടലിൽ വെച്ച് നടന്ന വർണ്ണാഭമായ ചടങ്ങിൽ പ്രമുഖ റേഡിയോ അവതാരകനും സിനിമാ നടനുമായ മിഥുൻ രമേഷാണ് മെഗാ വിജയിയെ പ്രഖ്യാപിച്ചത്. നറുക്കെടുപ്പിലൂടെ ഗുജറാത്ത് സ്വദേശിയായ കേതൻ കുമാർ ഒന്നാം സമ്മാനമായ പുത്തൻ JAC JS6 കാറിന് അർഹനായി. തന്റെ ജീവിതത്തിലെ അപ്രതീക്ഷിത ഭാഗ്യത്തിന്റെ സന്തോഷം കേതൻ കുമാർ ചടങ്ങിൽ പങ്കുവെച്ചു. രണ്ടാം സമ്മാനമായ പത്തോളം പേർക്കുള്ള ഒരു വർഷത്തെ സൗജന്യ ഗ്രോസറി കിറ്റുകളുടെ വിജയികളെയും ഇതേ ചടങ്ങിൽ വെച്ച് നറുക്കെടുപ്പിലൂടെ തിരഞ്ഞെടുത്തു.
മത്സര കാലയളവിൽ ഉടനീളം ആഴ്ച തോറുമുള്ള ലക്കി ഡ്രോ വഴി നിരവധി ഉപഭോക്താക്കൾക്ക് ആകർഷകമായ സമ്മാനങ്ങൾ നേരത്തെ തന്നെ ലഭിച്ചിരുന്നു. അന്താരാഷ്ട്ര വിനോദയാത്ര പാക്കേജുകൾ ഉൾപ്പെടെയുള്ള സമ്മാനങ്ങളാണ് ആഴ്ചകളിലെ വിജയികൾക്ക് ടേസ്റ്റി ഫുഡ് മുൻപ് കൈമാറിയത്. ടേസ്റ്റി ഫുഡ് മാനേജിങ് ഡയറക്ടർ മജീദ് പുല്ലഞ്ചേരി, സിഇഒ ഷാജി ബലയമ്പത്ത് എന്നിവർ സമാപന ചടങ്ങിൽ സംബന്ധിച്ചു. കേരളീയ തനിമ നിലനിർത്തിക്കൊണ്ട് ടേസ്റ്റി ഫുഡ് എന്ന ബ്രാൻഡിനെ ആഗോള നിലവാരത്തിലേക്ക് ഉയർത്തിയ ഉപഭോക്താക്കൾക്കുള്ള നന്ദി പ്രകടനമാണ് ഈ കാമ്പയിനെന്ന് മാനേജ്മെന്റ് പ്രതിനിധികൾ വ്യക്തമാക്കി.
മലയാളി സംരംഭകരുടെ കരുത്തിൽ വളരുന്ന ടേസ്റ്റി ഫുഡ് ഭാവിയിൽ ഇതിലും ആകർഷകമായ പ്രൊമോഷനുകൾ ഉപഭോക്താക്കൾക്കായി ഒരുക്കുമെന്ന് സിഇഒ ഷാജി ബലയമ്പത്ത് അറിയിച്ചു. ഗുണമേന്മയുള്ള ഉൽപ്പന്നങ്ങൾക്കൊപ്പം ഉപഭോക്താക്കളുടെ ജീവിതത്തിലേക്ക് സന്തോഷം പകരുന്ന സമ്മാനങ്ങളും നൽകുന്നതിലൂടെ യുഎഇ വിപണിയിൽ കൂടുതൽ സ്വാധീനമുറപ്പിക്കാനാണ് കമ്പനി ലക്ഷ്യമിടുന്നത്. പ്രവാസ ലോകത്ത് ഒരു ഭക്ഷ്യ ബ്രാൻഡ് നടത്തുന്ന ഇത്തരം വമ്പിച്ച കാമ്പയിനുകൾ ഉപഭോക്താക്കളും ബ്രാൻഡും തമ്മിലുള്ള ബന്ധം കൂടുതൽ ദൃഢമാക്കാൻ സഹായിക്കുന്നു.
