ദുബൈ: വിസ, താമസാനുമതി, പ്രവേശനാനുമതി ഉൾപ്പെടെയുള്ള സേവനങ്ങൾ കൂടുതൽ ലളിതവും വേഗമേറിയതും പൊതുജന സൗഹൃദവുമാക്കുന്നതിനുള്ള ജിഡിആർഎഫ്എ–ദുബൈയുടെ ‘ഇൻസ്റ്റിറ്റ്യൂഷണൽ റെപ്യൂട്ടേഷൻ സർവേ’- പുരോഗമിക്കുന്നു. സേവനങ്ങൾ നേരിട്ട് ഉപയോഗിക്കുന്നവരുടെ അനുഭവങ്ങളും അഭിപ്രായങ്ങളും നിർദേശങ്ങളും മനസ്സിലാക്കി തുടർന്നുള്ള മെച്ചപ്പെടുത്തലുകളിൽ അവ പ്രയോജനപ്പെടുത്തുകയാണ് സർവേയുടെ ലക്ഷ്യം.
ജനറൽ ഡയറക്ടറേറ്റ് ഫോർ ഐഡന്റിറ്റി ആൻഡ് ഫോറിനേഴ്സ് അഫയേഴ്സ്–ദുബൈ (ജിഡിആർഎഫ്എ–ദുബൈ) നടത്തുന്ന സർവേയിൽ ഒരു മിനിറ്റ് മാത്രം മാറ്റിവെച്ച് പൊതുജനങ്ങൾക്ക് പങ്കാളികളാകാം. അറബിയിലും ഇംഗ്ലീഷിലും സർവേ ലഭ്യമാണ്.
നിങ്ങളുടെ അനുഭവം സേവന വികസനത്തിന് വഴികാട്ടാം
ദുബൈയിൽ താമസിക്കുന്നവരും സന്ദർശകരും വിവിധ ഘട്ടങ്ങളിൽ ആശ്രയിക്കുന്ന പ്രധാന സർക്കാർ സേവനങ്ങളാണ് വിസ, താമസാനുമതി, പ്രവേശനാനുമതി എന്നിവ. ഈ സേവനങ്ങൾ ഉപയോഗിക്കുമ്പോൾ എന്താണ് ഏറ്റവും സൗകര്യപ്രദമായി അനുഭവപ്പെട്ടത്, ഏതൊക്കെ നടപടിക്രമങ്ങളിലാണ് കൂടുതൽ ലളിതവൽക്കരണം വേണ്ടത്, സേവനാനുഭവം എങ്ങനെ കൂടുതൽ മികച്ചതാക്കാം തുടങ്ങിയ കാര്യങ്ങളിൽ പൊതുജനങ്ങളുടെ നേരിട്ടുള്ള അഭിപ്രായത്തിനാണ് സർവേ പ്രാധാന്യം നൽകുന്നത്.
സേവനങ്ങളുടെ കാര്യക്ഷമതയും നടപടിക്രമങ്ങളുടെ സൗകര്യവും സ്ഥാപനവുമായി ഇടപഴകിയപ്പോഴുള്ള അനുഭവവും ജിഡിആർഎഫ്എ–ദുബൈയെക്കുറിച്ചുള്ള പൊതുവായ കാഴ്ചപ്പാടും സർവേയിലൂടെ രേഖപ്പെടുത്താം. ഇതിലൂടെ നിലവിലുള്ള സേവനങ്ങളുടെ ശക്തമായ വശങ്ങളും കൂടുതൽ ശ്രദ്ധ ആവശ്യമായ മേഖലകളും തിരിച്ചറിയാൻ സാധിക്കും.
പൊതുജനങ്ങളിൽ നിന്ന് ലഭിക്കുന്ന പ്രതികരണങ്ങൾ വിലയിരുത്തുന്നത് സേവനങ്ങളുടെ ഗുണനിലവാരം ഉയർത്താനും നടപടിക്രമങ്ങൾ കൂടുതൽ സുഗമമാക്കാനും ഉപഭോക്താക്കളുടെ മാറുന്ന ആവശ്യങ്ങളും പ്രതീക്ഷകളും മനസ്സിലാക്കാനും സഹായകമാകും. അതിനാൽ സർവേയിൽ രേഖപ്പെടുത്തുന്ന ഓരോ അഭിപ്രായവും ജിഡിആർഎഫ്എ–ദുബൈയുടെ തുടർച്ചയായ സേവന വികസന യാത്രയിലെ പൊതുജന പങ്കാളിത്തത്തിന്റെ ഭാഗമാകുന്നു.
തുടർച്ചയായ പുരോഗതിയിലേക്കുള്ള യാത്രയിൽ നിങ്ങളുടെ ഒരു മിനിറ്റ് സമയം നൽകി പങ്കാളികളാകൂ- എന്ന സന്ദേശത്തോടെയാണ് ജിഡിആർഎഫ്എ–ദുബൈ പൊതുജനങ്ങളെ സർവേയിൽ പങ്കെടുക്കാൻ ക്ഷണിക്കുന്നത്. മികച്ച അനുഭവങ്ങൾ പങ്കുവെക്കുന്നതിനൊപ്പം, കൂടുതൽ മെച്ചപ്പെടുത്തണമെന്ന് തോന്നുന്ന കാര്യങ്ങളും നിർദേശങ്ങളും രേഖപ്പെടുത്താനുള്ള അവസരമാണിത്.
സർവേയിൽ പങ്കെടുക്കുന്നവരുടെ വ്യക്തിഗതവും രഹസ്യസ്വഭാവമുള്ളതുമായ വിവരങ്ങൾ സംരക്ഷിക്കുമെന്ന് ജിഡിആർഎഫ്എ–ദുബൈ വ്യക്തമാക്കിയിട്ടുണ്ട്. ബ്രോഷറിലുള്ള QR കോഡ് സ്കാൻ ചെയ്തോ, നൽകിയിരിക്കുന്ന ലിങ്ക് വഴിയോ സർവേയിൽ പങ്കെടുക്കാം.
https://msurvey.government.ae/survey/General_Directorate_of_Residency_and_Foreigners_Affairs_Dubai/08k/en/direct?mailref=0
