‘എച്ച്സെഡ്പി ഇക്കോ പാക്കേജിംഗ്’ എന്ന പേരിൽ രൂപീകരിച്ച കൂട്ടായ്മയിലൂടെ മിഡിൽ ഈസ്റ്റ് ഉൾപ്പെടെയുള്ള ആഗോള വിപണികളിലേക്ക് പ്രകൃതിദത്ത പാക്കേജിംഗ് ഉൽപ്പന്നങ്ങളെത്തും.
ദുബായ്: യുഎഇ ആസ്ഥാനമായി പ്രവർത്തിക്കുന്ന പ്രമുഖ പാക്കേജിംഗ് കമ്പനിയായ ഹോട്ട്പാക്ക്, പേപ്പർ അധിഷ്ഠിത ഫുഡ് സർവീസ് പാക്കേജിംഗ് നിർമാണ രംഗത്തെ മുൻനിരക്കാരായ മലേഷ്യൻ കമ്പനി എച്ച്സെഡ് കോർപ്പറേഷനുമായി പുതിയ സംയുക്ത സംരംഭത്തിന് രൂപം നൽകി. ഒറ്റത്തവണ ഉപയോഗിക്കുന്ന പ്ലാസ്റ്റിക്കിന് പകരമായി പേപ്പർ ഉപയോഗിച്ചുള്ള പരിസ്ഥിതി സൗഹൃദ പാക്കേജിംഗ് ഉൽപ്പന്നങ്ങൾ ആഗോള വിപണിയിൽ എത്തിക്കുകയാണ് ലക്ഷ്യം.
‘എച്ച്സെഡ്പി ഇക്കോ പാക്കേജിംഗ്’ (HZP Eco Packaging) എന്ന് പേരിട്ടിരിക്കുന്ന ഈ പുതിയ സംരംഭം മിഡിൽ ഈസ്റ്റ്, തെക്കുകിഴക്കൻ ഏഷ്യ, ഓസ്ട്രേലിയ, ന്യൂസിലൻഡ്, വടക്കേ അമേരിക്ക തുടങ്ങിയ മികച്ച വളർച്ചാ സാധ്യതയുള്ള അന്താരാഷ്ട്ര വിപണികളെയാണ് പ്രധാനമായും ലക്ഷ്യമിടുന്നത്. ലോകമെമ്പാടും പ്രകൃതിദത്ത പാക്കേജിംഗ് ഉത്പന്നങ്ങളുടെ ആവശ്യം വർധിച്ചുവരുന്ന സാഹചര്യത്തിലാണ് ഈ നിർണായക നീക്കം.
ഇരു കമ്പനികളുടെയും സംയുക്ത പ്രവർത്തനം വഴി ഉൽപ്പാദന ശേഷി വർധിപ്പിക്കാനും ഉപഭോക്താക്കളുടെ മാറിവരുന്ന ആവശ്യങ്ങൾക്കനുസരിച്ച് നവീനമായ ഉൽപ്പന്നങ്ങൾ എത്തിക്കാനും സാധിക്കുമെന്ന് ഹോട്ട്പാക്കിന്റെ മാനേജിംഗ് ഡയറക്ടറും ഗ്രൂപ്പ് സിഇഒയുമായ അബ്ദുൽ ജബ്ബാർ പി.ബി. വ്യക്തമാക്കി. പാക്കേജിംഗ് രംഗത്ത് വിപുലമായ അന്താരാഷ്ട്ര ഉത്പാദന-വിതരണ ശൃംഖല സൃഷ്ടിക്കുക എന്ന ഹോട്ട്പാക്കിന്റെ ലക്ഷ്യത്തിലെ സുപ്രധാന ചുവടുവെപ്പാണിതെന്നും, മിഡിൽ ഈസ്റ്റിലെ തങ്ങളുടെ സാന്നിധ്യവും എച്ച്സെഡ് കോർപ്പറേഷന്റെ തെക്കുകിഴക്കൻ ഏഷ്യയിലെ വിപണി സ്വാധീനവും ഒത്തുചേരുമ്പോൾ വൻ സാധ്യതകളാണ് തുറക്കപ്പെടുന്നതെന്നും അദ്ദേഹം കൂട്ടിച്ചേർത്തു.
പ്രകൃതിദത്ത പാക്കേജിംഗ് സാങ്കേതികമായി പുരോഗമിച്ചതും അതോടൊപ്പം വാണിജ്യാടിസ്ഥാനത്തിൽ പ്രായോഗികവുമായിരിക്കണം എന്ന തുല്യ വിശ്വാസത്തിന്റെ ഫലമാണ് ഈ പങ്കാളിത്തമെന്ന് എച്ച്സെഡ് കോർപ്പറേഷൻ സിഇഒ ഡാറ്റോ ഡോ. ഡൊണാൾഡ് യാപ് പറഞ്ഞു. മലേഷ്യൻ വിപണിയിലെ തങ്ങളുടെ നിർമാണ വൈദഗ്ധ്യവും ഹോട്ട്പാക്കിന്റെ അന്താരാഷ്ട്ര വിതരണ ശൃംഖലയും ബ്രാൻഡ് മൂല്യവും ഒന്നിക്കുന്നത് വഴി വിവിധ വ്യവസായ മേഖലകളിൽ പ്ലാസ്റ്റിക് ഉപയോഗം ക്രമേണ കുറച്ചുകൊണ്ടുവരാൻ സഹായിക്കുമെന്ന് അദ്ദേഹം പ്രത്യാശ പ്രകടിപ്പിച്ചു.
ആദ്യ ഘട്ടത്തിൽ, അതിവേഗ സർവീസ് റെസ്റ്റോറന്റുകൾ (QSR), പ്രമുഖ കോഫി ബ്രാൻഡുകൾ, എയർലൈൻ കമ്പനികൾ, കാറ്ററിംഗ് സ്ഥാപനങ്ങൾ, ഫുഡ് ഡെലിവറി പ്ലാറ്റ്ഫോമുകൾ എന്നിവയെയാണ് ഈ സംരംഭം ലക്ഷ്യമിടുന്നത്. പ്ലാസ്റ്റിക് പാക്കേജിംഗിനെ ആശ്രയിക്കുന്നത് കുറയ്ക്കണമെന്ന കർശനമായ നിയമങ്ങളും ഉപഭോക്തൃ സമ്മർദവും ഏറ്റവും കൂടുതൽ നേരിടുന്ന മേഖലകളാണിവ. പേപ്പർ കപ്പുകൾ, ഫോൾഡിംഗ് കാർട്ടണുകൾ, പേപ്പർ ബാഗുകൾ എന്നിവയുൾപ്പെടെയുള്ള പ്രകൃതിദത്ത ഫുഡ് സർവീസ് പാക്കേജിംഗ് ഉൽപ്പന്നങ്ങളാണ് പ്രാരംഭ ഘട്ടത്തിൽ വിപണിയിലെത്തിക്കുക.
1995-ൽ ദുബായിൽ സ്ഥാപിതമായ ഹോട്ട്പാക്, ഇന്ന് ലോകമെമ്പാടുമായി 30 കേന്ദ്രങ്ങളിൽ പ്രവർത്തിക്കുകയും 100-ലധികം രാജ്യങ്ങളിലേക്ക് കയറ്റുമതി നടത്തുകയും ചെയ്യുന്ന ബഹുരാഷ്ട്ര സ്ഥാപനമാണ്. മലേഷ്യ ആസ്ഥാനമായ എച്ച്സെഡ് കോർപ്പറേഷൻ പേപ്പർ കപ്പുകൾ, ഫോൾഡിംഗ് കാർട്ടണുകൾ തുടങ്ങിയ പ്രകൃതിദത്ത, പേപ്പർ അധിഷ്ഠിത ഫുഡ് സർവീസ് ഉത്പന്നങ്ങളിൽ അന്താരാഷ്ട്ര വൈദഗ്ധ്യമുള്ള കമ്പനിയാണ്.
പ്രധാന അന്താരാഷ്ട്ര വിപണികളിലെ സാന്നിധ്യം ഉറപ്പുവരുത്തുന്നതിലൂടെയും പരിസ്ഥിതി സൗഹൃദ ഉൽപ്പന്നങ്ങൾ വ്യാപിപ്പിക്കുന്നതിലൂടെയും പ്രകൃതിദത്ത ഭക്ഷ്യ പാക്കേജിംഗ് രംഗത്ത് ആഗോളതലത്തിൽ മുന്നിലെത്താനാണ് ഹോട്ട്പാക്ക് ലക്ഷ്യമിടുന്നത്.
