അമേരിക്കൻ ലൈബ്രറി അസോസിയേഷനുമായി സഹകരിച്ച് ഷാർജ ബുക്ക് അതോറിറ്റി സംഘടിപ്പിക്കുന്ന ആഗോള സമ്മേളനത്തിന്റെ രജിസ്ട്രേഷൻ ആരംഭിച്ചു.
ഷാർജ, ജൂലൈ 18, 2026:ആർട്ടിഫിഷ്യൽ ഇന്റലിജൻസ് (AI), ആധുനിക വിദ്യാഭ്യാസ പരിഷ്കാരങ്ങൾ, ആരോഗ്യമേഖല എന്നിവയിൽ ലൈബ്രറികൾക്കുള്ള സ്വാധീനവും അവയുടെ ഭാവി രൂപരേഖയും ചർച്ച ചെയ്യുന്നതിനായി 13-ാമത് ഷാർജ അന്താരാഷ്ട്ര ലൈബ്രറി കോൺഫറൻസ് (SILC) നവംബർ 7 മുതൽ 9 വരെ നടക്കും.
അമേരിക്കൻ ലൈബ്രറി അസോസിയേഷനുമായി (ALA) സഹകരിച്ച് ഷാർജ ബുക്ക് അതോറിറ്റി (SBA) സംഘടിപ്പിക്കുന്ന ത്രിദിന സമ്മേളനം 45-ാമത് ഷാർജ അന്താരാഷ്ട്ര പുസ്തകോത്സവത്തോടനുബന്ധിച്ചാണ് അരങ്ങേറുന്നത്. ലോകമെമ്പാടുമുള്ള സ്കൂൾ, അക്കാദമിക്, പബ്ലിക്, സ്പെഷ്യലൈസ്ഡ് ലൈബ്രറി മേഖലകളിലെ വിദഗ്ധരും ഗവേഷകരും ഈ ആഗോള ഫോറത്തിൽ ഒത്തുചേരും.
സാങ്കേതികവിദ്യയും വായനാസംസ്കാരവും പരസ്പരം സമ്മേളിക്കുന്ന പുതിയ കാലഘട്ടത്തിൽ, വിജ്ഞാനകേന്ദ്രങ്ങളുടെ പ്രവർത്തനരീതികൾ എങ്ങനെ മാറണമെന്നാണ് സമ്മേളനം പ്രധാനമായും ചർച്ച ചെയ്യുന്നത്. ഡിജിറ്റൽ കാറ്റലോഗിങ്, കൃത്രിമബുദ്ധി അടിസ്ഥാനമാക്കിയുള്ള വിവരശേഖരണം, കൂടുതൽ ജനകീയമായ സേവനങ്ങൾ എന്നിവ ഉറപ്പാക്കാനുള്ള പ്രായോഗിക പദ്ധതികൾക്ക് കോൺഫറൻസ് രൂപം നൽകും.
ലൈബ്രറികൾ വെറുമൊരു പുസ്തകശാല എന്നതിനപ്പുറം അതിവേഗം മാറിക്കൊണ്ടിരിക്കുന്ന വിദ്യാഭ്യാസ-സാങ്കേതിക മാറ്റങ്ങളെ ഉൾക്കൊള്ളാൻ ശേഷിയുള്ള വിജ്ഞാന സ്ഥാപനങ്ങളായി മാറണമെന്ന് ഷാർജ ബുക്ക് അതോറിറ്റി സി.ഇ.ഒ അഹമ്മദ് ബിൻ റക്കാദ് അൽ അമേരി വ്യക്തമാക്കി. സുപ്രീം കൗൺസിൽ അംഗവും ഷാർജ ഭരണാധികാരിയുമായ ശൈഖ് ഡോ. സുൽത്താൻ ബിൻ മുഹമ്മദ് അൽ ഖാസിമിയുടെ സാംസ്കാരിക ദർശനങ്ങൾക്കും, ഷാർജ ബുക്ക് അതോറിറ്റി അധ്യക്ഷ ശൈഖ ബോദൂർ ബിന്ത് സുൽത്താൻ അൽ ഖാസിമിയുടെ നിർദേശങ്ങൾക്കും അനുസൃതമായാണ് ആഗോളതലത്തിൽ ശ്രദ്ധേയമായ ഈ കോൺഫറൻസ് വിഭാവനം ചെയ്തിരിക്കുന്നതെന്നും അദ്ദേഹം കൂട്ടിച്ചേർത്തു.
വിജ്ഞാന വിതരണത്തിൽ നിലവിലുള്ള വെല്ലുവിളികളെ നേരിടാനും പുതിയ സാങ്കേതികവിദ്യകൾ ഫലപ്രദമായി പ്രയോജനപ്പെടുത്താനും ലൈബ്രേറിയന്മാരെ പ്രാപ്തരാക്കുന്ന രീതിയിലാണ് ഇത്തവണത്തെ പരിപാടികൾ ക്രമീകരിച്ചിരിക്കുന്നതെന്ന് ഷാർജ ബുക്ക് അതോറിറ്റി പബ്ലിഷർ സർവീസസ് ഡയറക്ടർ മൻസൂർ അൽ ഹസാനി പറഞ്ഞു. വിജ്ഞാനസമൂഹ നിർമ്മിതിക്കായി വിദ്യാഭ്യാസ, സാമൂഹിക സ്ഥാപനങ്ങളുമായി മികച്ച പങ്കാളിത്തം ഉറപ്പാക്കാൻ ഇതിലൂടെ സാധിക്കുമെന്നും അദ്ദേഹം വ്യക്തമാക്കി.
അന്താരാഷ്ട്ര പുസ്തകപ്രസാധന രംഗത്തെയും വിവരസാങ്കേതിക മേഖലയിലെയും പ്രമുഖ കേന്ദ്രമെന്ന ഷാർജയുടെ സ്ഥാനം കൂടുതൽ ഉറപ്പിക്കുന്നതാണ് പുസ്തകോത്സവത്തോടനുബന്ധിച്ച് നടക്കുന്ന ഇത്തരം അന്താരാഷ്ട്ര കോൺഫറൻസുകൾ. സമ്മേളനത്തിൽ പങ്കെടുക്കാൻ താൽപ്പര്യമുള്ള ലൈബ്രറികൾക്കും വിദ്യാഭ്യാസ സ്ഥാപനങ്ങൾക്കുമായി ഔദ്യോഗിക ഡിജിറ്റൽ പോർട്ടൽ വഴിയുള്ള രജിസ്ട്രേഷൻ നടപടികൾ ആരംഭിച്ചിട്ടുണ്ട്.
